Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 207 Hüküm no: 406 Orijinal metin no: [58a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Petroz b. Nikola’nın, Yani b. Yorgi’nin babasından bağı satın aldığının ispatı Vech-i tahrîr-i sicil budur ki Karye-i Çengel’den Petroz b. Nikola ve Yani b. Yorgi meclis-i şer‘a hâzırân olduklarında mezbûr Petroz takrîr-i da‘vâ kılıp eyitdi ki senin baban Yorgi b. Levend hâl-i hayâtında ve kemâl-i sıhhatde iken bana bir kıt‘a bağını ki hudûd bir taraf Güteri bağına ve bir taraf Mihal bağına ve bir taraf bâyi‘ tarlasına ve bir taraf Marola bağına bu hudûd ile mahdûd olan bağı ve bir koz ağacın ile bin yüz akçeye bana bey‘ edip akçe teslîm ettim deyicek mezbûr Yani’den suâl olunup ben babamın sana bağı bey‘ ettiğini bilmezim dedikde mezbûr Petroz’dan beyyine taleb olunup Karaca b. Yusuf ve Kosta b. Markova nâm kimesneler şehâdet edip dediler ki zikr olunan bağını bin yüz akçeye bey‘ edip kabz-ı semen ve teslîm-i mebî‘ etti dediklerinde şehâdetleri ba‘de’t-ta‘dîl hayyiz-i kabûlde vâki‘ olup zikr olunan bağ mezbûr Petroz’a hükm olunduki bi’t-taleb sicil olundu. Vaka‘a’t-tahrîr fî evâhiri Ramazâni’l-mübârek sene 954. Şuhûdü’l-hâl: Hasan b. Abdullah, Ramazan b. Hüseyin, Kara Yusuf b. Abdullah, Burhan b. Hasan, Abdi b. Hasan, Nikola b. Poli, Manol b. Doğan, Papa Yani b. Nikola ve gayruhüm.