Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 211 Hüküm no: 418 Orijinal metin no: [59b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manol b. Manol’ün zaptettiği çiftliğe Hoca Fazlullah Zâviyesi’nin el koyması Vech-i tahrîr-i sicil budur ki Merhûm Hoca Fazlullah zâviyesine hâliyâ mütevellî olan Şah Çelebi b. Seydî meclis-i şer‘a hâzır olup karye-i Çengel’den Manol b. Manol eş-şehîr bi Yorgi muvâcehesinde takrîr-i kelâm kılıp eyitdi ki senin babanın ammisi Dimitri b. Haddâd fevt olup evlâd-ı zükûru kalmayıp kānûn üzre çiftliği tapuya müstahak olup sen hafiyyeten zabt eder imişsin hâliyâ ma‘lûm olup vakıf için zabt ederim dedikde mezbûr Manol’den suâl olunup ben bilmezim deyû cevâb vericek mezbûr Şah Çelebi’den beyyine taleb olunup Karaca b. Yusuf ve karye-i mezbûr papazı Papa Yani b. Nikola ve Manol b. Doğan ve Duka b. Tıranoz ve Dimitri b. Kosta nâm kimesneler şehâdet için hâzırûn olup eyitdiler ki biz şâhidleriz ve şehâdet ederiz mezkûr Haddâd fevt olup evlâdından Yani ve Dimitri ve Yorgi nâm oğullarına intikāl edip mezkûr Dimitri fevt olup evlâd-ı zükûru kalmayıp çiftlikten hisseyi kānûn üzre tapuya müstahakdır dediklerinde ba‘de’t-ta‘dîl şehâdetleri hayyiz-i kabûlde vâki‘ olup bi’t-taleb sicil olundu. Vaka‘a’t-tahrîr fî evâili Şevvâli’l-mükerrem sene 954. Şuhûdü’l-hâl: Mevlânâ Cafer Efendi b. Salih ve Süleyman Bey b. Abdullah el-Muhzır Kazasker, Kosta b. Markova, Nikola b. Poli, Yorgi b. Yani ve gayruhüm.