Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 226 Hüküm no: 467 Orijinal metin no: [65a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çavuş Hızır b. Mustafa ile Ramazan b. Durmuş’un arazilerini değiştirdikleri Vech-i tahrîr-i sicil budur ki Fahrü’l-emâcid ve’l-akrân çavuş Hızır b. Mustafa cânibinden vekîl-i şer‘î olan Hızır b. Ahmed meclis-i şer‘a hâzır olup Ramazan b. Durmuş muvâcehesinde ikrâr ve i‘tirâf edip eyitdi ki müvekkilim çavuş Hızır ile senin yer husûsunda iki kıt‘a [yer] verip hudûdları bir kıt‘anın Hüseyin mezrû‘una ve bir cânibi Hüsam Bey merzû‘una bir cânibi Çavuş tarlasına ve bir cânibi kezâlik ve bir âhar kıt‘anın bir cânibi Hüseyin tarlasına ve bir cânibi Hüsam Bey yerine bu cümle yerler verdim da‘vâm ve nizâ‘ım yoktur deyicek ve mezkûr Ramazan dahi çeşme kurbunda vâki‘ olan kıt‘a iki taraf Budak mezrû‘una ve bir cânibi Hasan yerine ve bir cânibi tarîk-i âm ve bir kıt‘a bağ Durbâli fındığına ve bir cânibi Budak Çelebi fındığına vâki‘ olan iki kıt‘a yeri mezkûr Çavuş[’a] verdim da‘vâm ve nizâ‘ım yoktur deyicek tarafeynin ikrârları şer‘an mu‘teber görülüp bi’t-taleb sicil olundu. Vaka‘a’t-tahrîr fî evâhiri Muharremi’l-harâm sene 955. Şuhûdü’l-hâl: Lütfi Çelebi b. İsâ Fakīh el-İmâm, Hüseyin b. Mestân, Mustafa b. Mehmed, Eynehan b. Osman, Mehmed b. Şaban.