Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 235 Hüküm no: 491 Orijinal metin no: [67b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadıköy mukâtaasını Kosta b. Markova’ya satan Yani b. Todora’nın parasını istemesi Vech-i tahrîr-i sicil budur ki Merhûm Sultân Selîm evkāflarından karyeti Kadı cibâyetini sene ihdâ ve hamsîne ve tis‘a mi’e yılını mukāta‘aya tutan Yani b. Todora ve karye-i Çengel’den Kosta b. Markova meclis-i şer‘a hâzırân olduklarında mezbûr Yani takrîr-i da‘vâ edip eyitdi ki sene-i mezbûru kazâ-i Yoros’da olan karyeleri sana on üç bin iki yüz akçeye mukāta‘aya verdim meblağ-ı merkūmu taleb ederim dedikde mezbûr Kosta cevâb verip eyitdi ki sâbıkan mütevellîye ve sana verdiğim akçeyi cümle hesâb ettim senin ile dokuz bin akçe alıp ve beş yüz akçe câbi Hasan b. Hızır kabz etmiştir, anı dahi kabûl etti ve bâkī üç bin beş yüz akçe çavuş Hayreddin’e verdim deyû cevâb verip mezbûr Yani inkâr ile cevâb vericek Ahmed Çelebi b. Hasan ve Hızır b. Ahmed biz şâhidleriz ve şehâdet ederiz mütevellîye ve sana dokuz bin akçe ve beş yüz akçe câbi Hasan Çelebi b. Hızır kabz edip sen dahi kabûl ettin ve üç bin beş yüz akçe çavuş Hayreddin’e teslîm etti deyû şe[hâdet-i] [şer‘iyye] ettiklerinde ba‘de’t-tezkiyye hayyiz-i kabûlde vâki‘ olup bi’t-taleb sicil olundu. Şuhûdü’l-hâl: Ali b. Veli, Hüseyin b. Abdullah, (__) Bâli b. Gaybî? ve gayruhüm.