Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 235 Hüküm no: 493 Orijinal metin no: [68a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta b. Markova ve Mustafa b. Ahmed arasındaki alacak verecek anlaşmazlığı Vech-i tahrîr-i sicil budur ki Kazâ-i Yoros’dan Akpınar nâm karyeden Mustafa b. Ahmed ve karye-i Çengel’den Kosta b. Markova meclis-i şer‘a hâzırân olduklarında mezbûr Kosta takrîr-i da‘vâ kılıp dedi ki merhûm ve mağfûrun-leh Sultân Selîm Hân aleyhi’r-rahmeti ve’r-rıdvân evkāfından sene ihdâ ve hamsîne ve tis‘a mi’e Zilhiccesi’nin on yedinci gününden karye-i Kadı cibâyetini yıl tamâmına varınca altmış iki bin akçeye mukāta‘aya alan Yani b. Todora’dan kazâ-i Yoros’da vâki‘ olan karyeleri târih-i mezbûrdan yıl tamâm olunca on üç bin iki yüz akçeye mukāta‘aya alıp sen kefîl bi’l-mâl oldun ba‘dehu evkāf mahsûlünden Mehmed Çelebi’ye ve İsâ nâm kimesneye bin beşer yüz akçeye birer kul bey‘ ettim ve bir kul dahi, Saçlı demekle ma‘rûf kimesneye bin iki yüz akçeye bey‘ ettim ve senin zimmetinde bir kul iki bin elli akçeye bey‘ olunmuştur ve dahi sana on beş müd on kile buğday üç bin üç yüz elli akçeye bey‘ ettim zikr olunan kullar akçelerin sen aldın cem‘an dokuz bin altı yüz akçe olup senden taleb ederim dedikde mezbûr Mustafa’dan suâl olundukda cevâb verip dedi ki iki bin yüz akçe mütevellîye senin deynine verdim ve bin üç yüz akçe Ramazan b. Hamza’ya verdim ve beş yüz akçe Hızır b. Ahmed’e verdim bâkī beş bin yedi yüz akçeyi sana teslîm ettim dedikde mezbûr Kosta inkâr edip almadım deyicek talebi ile sicil olundu. Vaka‘a’t-tahrîr fî evâhiri Zilka‘de sene 953. Şuhûdü’l-hâl: Mahmud b. Mehmed, Ramazan b. Hamza, Hasan b. Abdullah, Mustafa b. Mehmed.