Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 244 Hüküm no: 514 Orijinal metin no: [70b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çengelköy Vakfı’nın İstavros Vakfı ile yer üzerindeki anlaşmazlığı Vech-i tezkire oldur ki Karye-i Çengel’e hâliyâ mütevellî olan fahrü’l-emâsîl ve’l-akrân Şah Çelebi b. Seydî Çelebi ve İstavros vakıf karyeye mütevellî olan Yusuf b. Abdullah ile meclis-i şer‘a hâzırân olduklarında mezbûr Şah Çelebi takrîr-i da‘vâ kılıp dedi ki hâliyâ mütevellîsi olduğum Çengel nâm vakıf karye sınırına dâhil olan yerden bir kıt‘a yeri sâbıkan Ali b. Abdullah nâm kimesne gasben alıp sen mütevellîsi olduğun vakfa ilhâk etmiş benim mütevellî olduğum vakfa zarar ettiniz dedikde mezbûr Yusuf inkâr ile cevâb vericek ba‘dehu mezkûrân evkāfların hudûdlarından tefahhus olunup mezbûr Yusuf yedinde merhûm Sultân Bayezid zamânında emr-i şerîf ile teftîş olunup nişân-ı hümâyûn ile hudûdnâme verilmiş bulunup nazar olunup mazmûn-ı münîfinde şöyle mukayyed bilinip Aksakaloğlu yeri ile kethüdâ yeri arasında ki yumru taşdan büyük mavna yapıldığı vakit binâ olunan mahzen önünde deryâ kenarında vâki‘ olan yerli taşa müntehîdir deyû mukayyed bulunup mahzen yerinden suâl olunucak mezbûr Yusuf dedi ki bostan kuyusundan bir taraf kiraz ağacına varır deyû ikrâr ettikden sonra tahmînen arzen deryâ kenarı taraf dört dönüm ve tûlen beş dönüm mikdârı mazak şekl yer Çengel nâm vakıf karye yerinden idiği mezbûr mütevellî Yusuf yedinde olan nişânlı hudûdnâme mûcebince zâhir olup mezbûr Yusuf ikrâr dahi ettikden sonra zikr olunan yer mezbûr Çengel nâm vakıf karye [yerinden idiğine] mütevellî-i mezkûr Şah Çelebi talebi ile hükm olundu ki bi’t-taleb sicil olundu. [Vaka‘a’t-tahrîr] fî evâsıtı Cemâziyelevvel sene 953. Şuhûdü’l-hâl: Çırak Mahmud b. Mehmed, Ramazan b. Hüseyin, Mustafa Bey b. Abdullah be Gekvize, (__) Bey b. Abdullah bi Gekvize.