Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 75 Hüküm no: 37 Orijinal metin no: [4b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri b. İstati’nin Canoz b. Mihal’e borcunu ödediği Vech-i tahrîr-i sicil budur ki Canoz b. Mihal ve Maltepe’den Dimitri b. İstati meclis-i şer‘a hâzırân olduklarında mezbûr Canoz takrîr-i da‘vâ kılıp eyitti ki sâbıkan senden yüz elli akçe hakkım zâhir olup muhzıra havâle ettim idi dedikde mezbûr Dimitri ba‘de zamânın edâ ettim deyip mezbûr Canoz almadım deyû inkâr edip mezbûr Dimitri’den beyyine taleb olunup Manol b. Yorgi ve Yani b. Nikola nâm zimmîler hâzırân olup dediler ki bir aydır nakid doksan akçe ve bir altın verip edâ etti deyû şâhidleriz ve şehâdet ederiz deyip ba‘de’t-tezkiyye hayyiz-i kabûlde vâki‘ olup meblağ-ı merkūm yüz elli akçenin edâsına hükm olunup bi’t-taleb sicil olundu. Vaka‘a’t-tahrîr fî evâili Muharremi’l-harâm sene 956. Şuhûdü’l-hâl: Mehmed Bey b. Zaîm, Ramazan b. Hüseyin, Ali b. Hacı, Yorgi b. Aguston, Apostol b. Nikola, Yorgi b. Kadenko, İstemad b. İlya.