Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 77 Hüküm no: 46 Orijinal metin no: [5b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtih Sultan Mehmed Camii evkafından bazı yerlerin mukataasının Kantoz b. Yani’ye kiralandığı Vech-i tahrîr-i sicil [budur ki] Merhûm ve mağfûrun-leh Sultan Mehmed mahrûse-i İstanbul’da cedîd binâ olunan câmi‘- i şerîfine hâliyâ mütevellî olan fahru’l-emâsil ve’l-akrân câniblerinden vekîl olan Haydar Çelebi ve hâliyâ evkāf-ı mezbûra câbi olan Ahmed Çelebi meclis-i şer‘a hâzırân olduklarında takrîr-i kelâm kılıp eyitti ki kazâ-i mezbûrda karye-i Maltepe ve Akkilise ve kazâ-i Marmara’dan Kızıl Ada ve Heybeli ve Burgazlu ve Kınalu nâm adalar ile sene 953 Yenarı âhirinden üç sene vakfa âid öşr-i şer‘iyye ve rüsûm-ı örfiyyesin harâcdan gayrı cüz’î ve küllî Mehmed nâm kimesneye yüz yirmi bin beş yüz akçeye mukāta‘aya verilmiş idi. Hâliyâ karye-i Maltepe’den Fotinoz b. Yani nâm zimmî beş yüz akçe ziyâde edip ibtidâ-i târihten verdik dediklerinde mezbûr Fotinoz dahi ibtidâ-i târihten üç yıla yüz yirmi bir bin akçeye kabûl ettim, mültezim oldum deyicek ve zarar-ı mâl[ına] Papa Yorgi b. Plakide kefîl bi’l-mâl olup mezbûrânlar dahi kefâleti kabûl edip sıhhat-i mukāta‘a mukarrer olup bi’t-taleb sicil olundu. Vaka‘a’t-tahrîr fî evâili Muharremi’l-harâm sene 956. Şuhûdü’l-hâl: Ramazan b. Hüseyin, Ali b. Hacı, Mahmud b. Abdullah er-râcil ve Kosta Kethüdâ Bu husûsa Fotinoz ma‘rifetiyle tâlib-i iştirâk mezbûr tâliblerin zarar[ına] İlya nâm yahudi kefîl olup bi’t-taleb kayd olundu.