Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 81 Hüküm no: 55 Orijinal metin no: [6b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todora b. Kurt’un tarlasını Papa Kosta b. Todora’ya sattığı Vech-i tahrîr-i sicil budur ki Karye-i Pendik’den Papa Kosta b. Todora ve Todora b. Kurt meclis-i şer‘a hâzırân olduklarında mezbûr Papa Kosta takrîr-i da‘vâ kılıp eyitti ki sen bana bir kıt‘a tarlayı ki hudûd bir taraf Borazan tarlasına ve bir taraf mezbûr Borazan bağına ve bir taraf benim tarlam ile ve bir cânibi Nikola Çula tarlasına muttasıldır, işbu hudûd zikr olunan tarlayı bana altı yüz akçeye bey‘- i örfiyye bey‘ edip teslîm-i mebî‘ ettin dedikde mezbûr Todora inkâr edip gıbbe’l-inkâr beyyine taleb olunup Yani b. Manol ve Todora b. Yorgi ve Kosta b. Papa ve Manol b. Borazan bi’l-lafz ve’l-ma‘nâ edâ-yı şehâdet edip dediler ki biz şâhid edip zikr olunan yeri altı yüz akçeye bey‘ edip, kabz edip, teslîm edip şehâdet ettiklerinde talebi ile sicil olundu. Vaka‘a’t-tahrîr fî evâhiri Muharrem sene 956. Şuhûdü’l-hâl: Mahmud Bey b. Abdullah, Bekir b. Mahmud, Mustafa b. Ali, Mustafa b. Mehmed, Validin b. Baba Yezid, Burhan b. Ahmed, Orhan b. Ahmed, Ramazan b. Hüseyin.