Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 88 Hüküm no: 77 Orijinal metin no: [9a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İlyas b. Abdullah’ın kölesi Şirmerd b. Abdullah’ı âzâd ettiği Vech-i tahrîr-i sicil oldur ki Nefs-i Üsküdar’dan topçular zümresinden İlyas b. Abdullah nâm kimesne zümre-i mezbûr İlyas Bâli b. Hüseyin ve Ahmed Çelebi b. ( ) nâm kimesne mahrûse-i Karaamid’de? fevt oldu deyû şehâdet ettiklerinde ba‘de’t-tezkiyye hayyiz-i kabûlde vâki‘ olup mezbûr müteveffâ İlyas’ın hâzır vârisi olmayıp mechûl oldukda hâliyâ kasaba-i mezbûra nasb-ı pâdişâhî ile emîn olan Mustafa Bey b. Abdullah [zavâbıt-ı] beytülmâldir, bir kulu Şirmerd b. Abdullah kulu taleb ettikde mezbûr kuldan istintâk olundukda bana efendim sefer-i hümâyûna gittiği vakit beni müdebber-i mukayyed edip dedi ki ben ölmezden ol kırk gün evvel cümle malımdan âzâd olsun deyip ben dahi kabûl ettim deyicek mezbûr zavâbıt-ı meyyitü’l-mâl olan Mustafa Bey inkâr edip gıbbe’l-inkâr beyyine taleb olunup udûl-i müslimînden Mahmud Bey b. Abdullah Dizdar ve Süleyman Çelebi b. Murad ve Hacı Şecâ b. Abdullah nâm kimesne biz şâhidleriz ve şehâdet ederiz mezbûr İlyas sefer-i hümâyûna gittiği vakit bizi işhâd edip işbu müşârün-ileyh Şirmerd b. Abdullah nâm kulumu ben ölmezden evvel kırk gün evvel âzâd olsun deyû şehâdet-i şer‘iyye edâ ettiklerinde ba‘de’t-tezkiyye hayyiz-i kabûlde vâki‘ olup mezbûr kulun ıtkına hükm olundu ki bi’t-taleb sicil olundu. Vaka‘a’t-tahrîr fî evâili Rebî‘ayn sene 956. Şuhûdü’l-hâl: Mevlânâ Taceddin Halîfe b. Ali el-İmâm ve Mevlânâ İsâ Halîfe b. Fazlullah ve Hoca Abdullah b. Yahşi, Mehmed b. Şaban ve gayruhüm.