Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 93 Hüküm no: 92 Orijinal metin no: [11a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasnâ bt. Nasûh ile Ramazan b. Durak’ın boşandıkları Vech-i tahrîr-i sicil budur ki Kazâ-i Yoros’dan Ramazan b. Durak yedinden emr-i şerîf îrâd edip Yoros efendisiyle Gekvize kadısı cem‘ olup deyû emr olunup ber-mûceb-i emr-i efendi hızmet-i pâdişâhîde olup ben fakîre emr edip mezbûr ber-mûceb-i emr karye-i Kutluğmuş’a varılıp Hasnâ bt. Nasûh ihzâr olup ben hul‘ etmedim inkâr gıbbe’l-inkâr beyyine taleb olup âciz oldukda es-sulhu hayrun ile âmil olup müslümanlar araya girip mezbûr Ramazan b. Durak ile Hasnâ bt. Nasûh araların ibrâ-i küllî edip mehirden ve nafakadan ve sâir sagīr da‘vâsından ve esbâb da‘vâsından küllîyen ibrâ-i küllî mezbûr Ramazan da‘vâ etmemeye ikrâr edip ve mezbûre Hasnâ dahi küllîyen da‘vâdan ferâgat edip ikrârların bi-hasebi’ş-şer‘ şer‘an mu‘teber görülüp sıhhat-i ibrâ mukarrer olup hükm olundu. Vaka‘a’t-tahrîr fî evâili Rebî‘ayn sene 956. Şuhûdü’l-hâl: Sefer b. Hasan, Abdi b. Hasan, Hamza b. Hasan, Mürüvvet b. Ahmed, Koz? b. Süleyman, Yusuf b. Ahmed, Receb b. Mehmed, diğer Receb b. Baylı, Haydar b. Mehmed, Lütfi b. Mehmed, Veli b. Pir Ali, Devlethân b. Ali, Hoca Mehmed b. Resul ve gayruhüm