Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 110 Hüküm no: 145 Orijinal metin no: [16a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihal Yorgi’nin Nikola b. Poli’yi dövdüğü Vech-i tahrîr-i sicil budur ki Karye-i Çengel’e hâliyâ âmil olan Nikola b. Poli ve Mihal Yorgi meclis-i şer‘a hâzırân olduklarında mezbûr Nikola takrîr-i da‘vâ kılıp eyitti ki bana evine gel deyip beni bir toyağa ile koluma darb-ı şedîd edip, mecrûh etti dedikde mezbûr Mihal’den su’âl olunup inkâr edip benim evime gelmedi ve görmedim ve darb dahi etmedim deyû inkâr edip gıbbe’l-inkâr mezbûr Nikola’dan beyyine taleb olunup Yorgi b. Nikola ve Neccâr Manos b. Kosta ve Dimitri b. İstemad nâm kimesneler dediler ki biz hâzır idik, mezbûr âmil[e], Nikola gel deyip yanımıza gelip mezbûr Mihal kalkıp bir toyağa ile darb-ı şedîd etti, gördük deyû şehâdet ettiklerinde ba‘de’t-tezkiyye hayyiz-i kabûlde vâki‘ olup mezkûr Mihal, mezbûr Âmil Nikola’yı darb-ı şedîd etti[ği] mukarrer olup bi’t-taleb sicil olundu. Vaka‘a’t-tahrîr fî evâsıtı Cemâziyelevvel sene 956. Şuhûdü’l-hâl: Mahmud Çelebi b. Turgud, Karaca b. Yusuf, Çırak Mahmud b. Mehmed, Kara Yusuf b. Abdullah, İsâ Bâli b. Mustafa, Turgud Çelebi b. Hasan, Mehmed b. Hızır, Kara Yani b. Nikola, Yorgi b. Yani ve gayruhüm.