Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 115 Hüküm no: 162 Orijinal metin no: [18a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karaca b. İbrahim’in, eniştesi Yusuf b. Hızır’ın İstavros Vakfı’na olan borcunu ödediği Vech-i tahrîr-i sicil budur ki Mütevellî Handan b. Abdullah ve Karaca İbrahim b. Hüseyin meclis-i şer‘a hâzırân olduklarında mezbûr Handan takrîr-i kelâm kılıp eyitti ki enişten Yusuf b. Hızır zimmetinde mâl-ı vakıfdan bin akçe var idi. Fevt olup zimmetinde kalıp sende bin beş yüz akçesi vardır, senden taleb ederim dedikde mezbûr İbrahim’den su’âl olunup cevâb verip dedi ki beş yüz akçesin kendine verdim, bâkī bin akçe kalıp ba‘de’l-vefât merhûm Selmân Ağa vakfına beş yüz akçe deyni sâbit olup hükm-i kadı ile verdim ve beş yüz akçe İstavros vakfına deyni var idi hükm-i kadı ile ona verdim, deyicek mezbûr Handan inkâr edip gıbbe’l-inkâr ve’l-mukābele Hızır b. Ahmed ve Mustafa b. Mehmed şehâdet edip fi’l-vâki‘ beş yüz akçe İstavros câbisi Mahmud b. Sinan’a ve beş yüz akçe Mütevellî Süheyl b. Abdullah[’a] hükm-i kadı ile sâbit olan deyni için verdi dediklerinde ba‘de’t-tezkiyye şehâdetleri hayyiz-i kabûlde vâki‘ olup bi’t-taleb kayd olundu. Vaka‘a’t-tahrîr fî evâili Cemâziyelâhir sene 956. Şuhûdü’l-hâl: Ahmed Çelebi b. Hasan, Hasan b. Abdullah, Mustafa b. Abdullah