Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 121 Hüküm no: 178 Orijinal metin no: [19b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi b. Macar’ın Ali Çelebi b. Hüsam Bey’i dövdüğü ve eşyalarını aldığı Vech-i tahrîr-i sicil budur ki Nefs-i Üsküdar’dan Ali Çelebi b. Hüsam Bey şerî‘at mahfilinde takrîr-i da‘vâ kılıp eyitti ki işbu müşârün-ileyh Yorgi b. Macar muvâcehesinde beni sen tutup darb edip bir dülbendim ve bir ferâcem ve bir kuşak ve bir masad ve bir bıçak ve bir dest-i mâlım soyup alıp bana hayf ve zulm ettin dedikde mezbûr Yorgi’den su’âl olunup inkâr edip gıbbe’l-inkâr beyyine taleb olunup ve Hasan Bâli b. Mustafa ve İmdâd b. Mustafa Dede nâm kimesneler dediler ki biz hâzır idik, bize ikrâr ettin, zikr olan esbâbları aldım ammâ Pendikli Yani hâtununa verdim, var versin dedin vermediler deyicek ben senin esbâbın kadıya varmayınca vermezem dedin deyû şehâdet ettiklerinde ba‘de’t-tezkiyye şâhidân-ı mezbûrânın şehâdetleri hayyiz-i kabûlde vâki‘ olup bi’t-taleb sicil olundu. Vaka‘a’t-tahrîr fî evâhiri Cemâziyelâhir sene 956. Şuhûdü’l-hâl: Ahmed Çelebi b. Hasan, Hasan b. Abdullah, Murad b. Muharrem ve gayruhüm