Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 131 Hüküm no: 209 Orijinal metin no: [22b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola b. Nikola’nın Süleyman b. Ebri’ye borcu olduğu Vech-i tahrîr-i sicil budur ki Süleyman b. Ebri ve karye-i Kadı’dan Nikola b. Nikola meclis-i şer‘a hâzırân olduklarında mezbûr Süleyman takrîr-i da‘vâ kılıp eyitti ki sana karz-ı hasen otuz dört aded altın verdim dedikde mezbûr Nikola’dan su’âl olunup inkâr edip gıbbe’l-inkâr mezbûr Süleyman’dan beyyine taleb olunup Tıranoz b. Yorgi ve Yani b. Lefter nâm zimmîler dediler ki mezbûr Süleyman, mezbûr Nikola[’ya] otuz dört tâmmü’l-vezn altın karz verip teslîm edip bir yıl tamam olunca mu‘âmele almaya deyicek ba‘de’t-tezkiyye şehâdetleri hayyiz-i kabûlde vâki‘ olup mezbûr Süleyman’ı otuz dört aded altın mezkûr Nikola’dan hükm olundu ki bi’t-taleb sicil olundu. Vaka‘a’t-tahrîr fî evâili Şa‘bâni’l-mu‘azzam sene 956. Meblağ-ı merkūm muhzır havâle şüd. Şuhûdü’l-hâl: Sinan Bey b. Abdullah, İskender b. Abdullah, Duka b. Yorgi Kethüdâ, Dimitri b. Lazari, Manol b. Voyvoda, Andon b. Duka ve gayruhüm