Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 139 Hüküm no: 235 Orijinal metin no: [25b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi b. Dimitri Bahadır’ın mutasarrıf olduğu iskelenin Yorgi Tali b. Yani’ye ait olduğu Vech-i tahrîr-i sicil [budur ki] Karye-i İstavros’dan Yorgi Tali b. Yani ve Yorgi b. Dimitri Bahadır meclis-i şer‘a hâzırân olduklarında mezbûr Yorgi Tali takrîr-i da‘vâ kılıp eyitti ki senin mutasarrıf olduğun iskele hudûd bir taraf Dimitri evine ve bir cânibi mezkûr Yorgi Bahadır evine ve bir cânibi tarîk-ı âmma ile ve bir cânibi deryâ ile mahdûd olan yer benim babam ve dedem mülküdür dedikde mezbûr Yorgi’den su’âl olundukda inkâr edip gıbbe’l-inkâr beyyine taleb olunup Mehmed b. Murad ve Yani b. Manol Haddâd nâm kimesneler biz şâhidleriz ve şehâdet ederiz, Yorgi Bahadır mutasarrıf olduğu iskele ki mezkûr Yorgi Tali’nin babasının ve dedesinin mülküdür, dedikde ba‘de’t-tezkiyye şehâdetleri hayyiz-i kabûlde vâki‘ olup zikr olan iskele mezkûr Yorgi Tali’nin mülk[ü] idiğine hükm olunup bi’t-taleb kayd olundu. Vaka‘a’t-tahrîr fî evâili Ramazâni’l-mübârek sene 956. Şuhûdü’l-hâl: Ali b. Veli, Hüseyin b. Abdullah er-râcil, Mustafa b. Mehmed, Hızır b. Abdullah er-râcil, Ramazan b. Hüseyin, Manos b. İstefan, Dimitri Makri b. Yani