Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 172 Hüküm no: 350 Orijinal metin no: [35b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihri bt. Mustafa’nın miras konusunda amcası Veli b. Davud ile anlaştıkları Vech-i tahrîr-i sicil budur ki Karye-i Dudullu’dan Veli b. Davud ve kardeş kızı Mehri bt. Mustafa meclis-i şer‘a hâzırân olduklarında mezbûr[e] Mihri takrîr-i da‘vâ kılıp eyitti ki baba Mustafa’dan bana ırs-i şer‘ ile intikāl eden hisseyi ve her bir kardeşlerimden ırs-i şer‘ ile intikāl eden hisseyi biz yetîme iken sen kabz etmişsin taleb ederim dedikde mezbûr Veli inkâr edip gıbbe’l-inkâr mezbûre Mihri’den beyyine taleb olunup âciz oldukda mezbûr Veli bi’t-tav‘ ve’r-rızâ ikrâr edip bir ev ve anbarı kaldı deyû ikrâr edip artık nesnesi yoktur, deyicek bir evi ve bir anbarı verip mezbûre Mihri ziyâde taleb etmeyip ve mezbûr Veli dahi evden ve anbardan taleb etmezin deyû da‘vâlardan ferâgat ettim deyû tarafeynden ikrârları ve tesâdukları bi-hasebi’ş-şer‘, şer‘an mu‘teber görülüp sıhhat-i ibrâya hükm olundu. Vaka‘a’t-tahrîr fî evâhiri Rebi‘ilâhir sene 957. Şuhûdü’l-hâl: Mustafa b. İbrahim el-Kayyım, Durbâli b. Gaybi, Nebi Çelebi b. Hasan el-müezzin ve Ramazan b. Hüseyin ve gayruhüm