Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 176 Hüküm no: 360 Orijinal metin no: [36b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süheyl Çelebi b. İbrahim’in kullandığı bostan yerinin Malkoç b. Hamza’ya ait olduğu Vech-i tahrîr-i sicil budur ki Süheyl Çelebi b. İbrahim Bey Malkoç b. Hamza’yı meclis-i şer‘a ihzâr edip üzerine takrîr-i da‘vâ kılıp dedi ki babam merhûm İbrahim Bey hâl-i hayâtında Samandıra’ya gelip sâkin olduğu târihde Elmalıdere demekle ma‘rûf mevzi‘de bir kıt‘a yeri bostan eyleyip mutasarrıf olmuşdur, babam fevt olmakla hâliyâ taleb ederim, dedikde mezbûr Malkoç bi’l-muvâcehe cevâb verip zikr olunan da‘vâ eylediği yer benim tapulu yerimden olup mezbûr İbrahim Bey gelip bostan ekip fuzûlen tasarruf eyledi, mezbûr İbrahim Bey fevt oldukdan sonra mezbûr bostan yerin yine benim tapulu çiftliğim hudûdunda dâhil olduğu ecilden tasarruf eyledim, sekiz yıldan ziyâdedir ki bilâ mâni‘ tasarrufumdadır, deyû kelimât eyledikde mezbûr Süheyl Çelebi dahi ecel tâm olup bu mikdâr zamân bilâ mâni‘ te’hîr-i da‘vâ eyleyip ve te’hîr-i sebeb su’âl olundukda cevâb-ı şâfisi dahi olmayıp zikr olunan bostan yeri yine kemâkân mezbûr Malkoç’a ber-mûceb-i kānûn-ı pâdişâhî mukarrer kılınıp mâ-hüve’l-vâki‘ bi’t-taleb sicil olundu. Tahrîren fî evâili Rebî‘ayn li-sene seb‘a ve hamsîn ve tis‘a mie. Şuhûdü’l-hâl: Murad Abdullah b. Yahşi ve Hatib Mehmed Fakīh b. Davud ve Hızır b. Ahmed ve Latif Hoca b. Ali Hoca, Mehmed b. Hüseyin, Abdullah b. Veli ve Mustafa b. Mehmed ve Ramazan b. Hüsam, Seyfullah b. İlyas, Ahmed b. Hüseyin, Yunus b. Hüseyin, Nuh Bâli b. Durmuş ve gayruhüm.