Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 202 Hüküm no: 440 Orijinal metin no: [44b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Margarika bt. Yuvan’ın Nikola b. Poli’yi yaraladığı Vech-i tahrîr-i hurûf oldur ki Karye-i Çengel’den Nikola b. Poli meclis-i şer‘a karye-i mezbûrdan Margarika bt. Yorgi nâm dul hâtunu ihzâr edip sene seb‘a ve hamsîn ve tis‘a mie Recebi’nin on üçüncü gece[sinde] evine nâmahremler getirip nâ-meşrû‘ fi‘il edip bana mütevellî vekîl edip karyeyi gözet deyû ısmarlamış idi. Ben dahi varıp senin evine nâmahremler gelip gel berî dediğimde beni demir şiş ile dürtüp beni mecrûh etti, dedikde mezbûr Margarika’dan su’âl olunup inkâr edip mezbûr Nikola’dan beyyine taleb olunup Kosta b. Yani ve Andriya b. Semendire ve Manol b. Sendali nâm zimmîler dediler ki, biz şâhidleriz ve şehâdet ederiz, senin evine nâmahremler getirirsin dedikde bir demir şiş ile mezbûr Nikola’yı darb edip mecrûh etti deyû şehâdet-i şer‘iyye edâ ettiklerinde ba‘de’t-tezkiyye şâhidân-ı mezbûrânın şehâdetleriyle hayyiz-i kabûlde vâki‘ olup bi’t-taleb kayd-ı sicil olundu. Vaka‘a’t-tahrîr fî evâsıtı Recebi’l-mürecceb sene 957 Şuhûdü’l-hâl: Murad b. Mehmed, Mahmud Bey b. Abdullah er-râcil, Ali b. Abdullah el-hayyât, Koca b. Yusuf, Mustafa b. Mehmed, Hüseyin b. Hasan, Kara Yusuf b. Abdullah, Ramazan b. Hüseyin, Ramazan b. Umur, Kakali Yani b. ( ), Kosta b. Marko, Nikola b. Dimitri Marko, Manol b. Nikola