Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 212 Hüküm no: 474 Orijinal metin no: [47a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayod b. Todora ile Müslüman olan eski eşi Zâhide bt. Abdullah’ın ibrâlaştıkları Vech-i tahrîr-i hurûf oldur ki Karye-i Kızılada’dan Panayod b. Todora meclis-i şer‘de ikrâr ve i‘tirâf edip dedi[ki] işbu müşârün-ileyh Zâhide bt. Abdullah nâm hâtun sâbık[an] zimmîye iken benim hâtunum idi, ba‘de zamânın İslâm’a gelip mâbeynlerinde ibrâ ve ıskāt edip sekiz bin akçeye ibrâ ve ıskāt ettim deyip ve mezbûre Zâhide’den su’âl olundukda bu zamâna gelince sâir kazıyyeden ferâgat ettim, sekiz bin akçe hesâbı üzere ziyâde da‘vâdan ferâgat ettim deyû ikrâr bi’t-taleb kayd-ı sicil olundu. Vaka‘a’t-tahrîr fî evâhiri Şa‘bâni’l-mu‘azzam sene 957. Şuhûdü’l-hâl: Mustafa Çavuş b. Dergâh-ı a‘lâ ve Ahmed Çelebi b. Hüseyin el-câbi, Mustafa b. Mehmed, Mustafa b. Abdullah (…?), Kara Yusuf b. Abdullah, Şaban b. Abdullah ve Hasan Kethüdâ b. Hamza ve Ahmed b. Sirâc, Kosta b. Simoz, Yorgi b. Aguston, Yani b. Tıranoz ve gayruhüm mine’l-hâzırîn