Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 229 Hüküm no: 524 Orijinal metin no: [52a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Erine bt. Yani’nin Karamanlı Karaca b. Sevastos’u yaraladığı Vech-i tahrîr-i hurûf oldur ki Karye-i Kadı’da sâkin olan Karamanlı Karaca b. Sevastos ve Erine bt. Yani meclis-i şer‘a hâzırân olduklarında mezbûr Karaca takrîr-i da‘vâ kılıp eyitti ki sen benim başım yardın, deyip mezbûre Erine’den su’âl olundukda inkâr ile cevâb vericek mezbûr Karaca’dan sıdk-ı makāline muvâfık beyyine taleb olunup mezbûre Erine[’nin] ben darb ettim deyû ikrârına Duka b. Yorgi ve Yorgi b. Dimitri, Todora b. Mihal ve Kateroz b. ( ) ve Yani b. Dimitri nâm zimmîler meclis-i şer‘a li-ecil-i şehâde hâzırûn olup bize ikrâr edip mezbûr Erine ben darb ettim, deyû ikrâr etti deyû şehâdet-i şer‘iyye ettiklerinde ba‘de’t-tezkiyye hayyiz-i kabûlde vâki‘ olup mâ-hüve’l-vâki‘ bi’t-taleb kayd-ı sicil olundu. Vaka‘a’t-tahrîr fî evâili Zilka‘de sene 957. Şuhûdü’l-hâl: Mehmed b. Ali, Yunus b. Abdullah en-ne‘âl, Mustafa b. Mehmed, Usta Hasan b. Musa, Ramazan b. Hüseyin