Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 266 Hüküm no: 647 Orijinal metin no: [64a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdi b. Vakkas’ın Zühre bt. Abdullah’ın evini soyduğu Vech-i tahrîr-i hurûf oldur ki Karye-i Viran’dan Zühre bt. Abdullah tarafından vekâlet[i] sâbit olan Ali b. Abdullah meclis-i şer‘a hâzır olup karye-i mezbûrdan Abdi b. Vakkas[’ı] ihzâr edip üzerine takrîr-i da‘vâ kılıp müvekkilem Zühre’nin evi açılıp esbâbı gâret olup zan sendendir, dedikde mezbûr Abdi’den su’âl olunup benim haberim yoktur, almadım ve sâbık zevci fevt olduğu zamânda havlusuna girdim, sonra min ba‘d havlusuna girmedim, deyû inkâr edip mezbûr Ali’den beyyine taleb olunup âciz oldukda mezbûr Abdi’ye yemîn teklîf olunup yemîn verilmek üzere iken mezbûr Abdi havlusuna girdim sonra eri bana sahan verdi girip aldım, deyû ikrâr mezbûr Ali talebi ile kayd-ı sicil olundu. Vaka‘a’t-tahrîr fî evâhiri Rebi‘ilevvel sene 958. Şuhûdü’l-hâl: Şaban Bey b. Abdullah ve Hızır b. Ahmed, Ali b. Abdullah, Sefer Çelebi b. İskender, Saruca b. Rüstem, Şehsuvar b. Durak, Ramazan b. Hüseyin, Ali b. Hacı Fakīh, Cafer b. Ramazan, Mustafa b. Mehmed