Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 267 Hüküm no: 649 Orijinal metin no: [64a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa b. Umur’un Dimitri b. Yorgi’ye ait gübreyi Mihal b. Manol’e sattığı Vech-i tahrîr-i hurûf oldur ki Karye-i Maltepe’den Dimitri b. Yorgi ve Mihal b. Manol meclis-i şer‘a hâzırân olduklarında sâbıkan ben koyun ağılında olan dökülmüş gübreyi on beş akçe Musa b. Umur ile Umur b. Hamza bana bey‘ edip ben dahi devşirip kesip hâzır etmiş idim, ba‘de zamânın senin bostanında buldum taleb ederim, dedikde mezbûr Mihal’den su’âl olunup bana Musa getirip satdı, ben senin devşirdiğin gübre idiğin bilmezem deyicek mezbûr Dimitri’den beyyine taleb, Kosta b. Simoz ve Yani b. Tıranoz nâm zimmîler şehâdet edip Umur ve Musa ağılda olan gübreyi bey‘ etti, ba‘dehû mezbûr Dimitri devşirip ve kesip hâzır ettikden sonra Musa alıp işbu Mihal’e bey‘ etmişdir, el-ân bostanda olan gübre bunun devşirip emek çekdiği gübredir deyû şehâdet ettiklerinde mâ-hüve’l-vâki‘ bi’t-taleb kayd-ı sicil olundu. Vaka‘a’t-tahrîr fî evâhiri Rebi‘ilevvel sene 958. Şuhûdü’l-hâl: Mustafa b. Mehmed, Dimitri b. Tıranoz ve Todora b. Yani, Papa Aleksi b. Tıranoz ve gayruhüm