Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 282 Hüküm no: 698 Orijinal metin no: [69a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İskender Paşa Vakfı’nın Mehmed b. İlyas’a yer kiraladığı Vech-i tahrîr-i hurûf oldur ki Karye-i Kadı’da merhûm İskender Paşa evlâdından Osman Bey b. İskender Paşa ve gayrıları taraflarından sâbitü’l-vekâle vekîl olan vakfına mütevellî olan Bâli b. Abdullah meclis-i şer‘a karye-i Kadı’dan Mehmed b. İlyas[’ı] ihzâr edip üzerine takrîr-i kelâm kılıp mütevellî olduğum vakıf yerlerden karye-i mezbûr kurbunda vâki‘ olan tarladan bir evlek yer tahmînen bennâ zirâ‘ıyla kırk sekiz zirâ‘ tûlen ve arzan otuz iki zirâ‘ yeri icâre-i tavîl ile her senede yirmi dört akçeye icâreye verdim, sene semân ve hamsîn ve tis‘a mie Muharremi’l-harâmından her üç yılda bir akd-i cedîd ola bir gün mütecâviz olsa fi’l-evvel akd olup seksen yıla icâreye verdim, nice dilerse mutasarrıf olalar dedikde mezbûr Mehmed’den su’âl olunup zikr olan mahdûd yeri her senede bana yirmi dört akçeye icâreye seksen yıla icâreye kabûl ettim, deyicek tarafeynden sâdır olan ikrârları bi-hasebi’ş-şer‘ mu‘teber görülüp sıhhat-i akd-i icâre mukarrer olup mâ-hüve’l-vâki‘ bi’t-taleb kayd-ı sicil olundu. Vaka‘a’t-tahrîr fî evâili Recebi’l-mürecceb sene 958. Şuhûdü’l-hâl: İbrahim b. Abdullah, Haydar b. Abdullah, Ali b. Mehmed, Cafer b. Ramazan, İskender b. Abdullah ve gayruhüm