Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 290 Hüküm no: 723 Orijinal metin no: [71b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gebze ve Yoros kadılıklarından İstanbul’a buğday ve arpa gönderilmesi Kıdvetü’l-kuzât ve’l-hukkâm, ma‘denü’l-fazl ve’l-kelâm, Gekvize ve Yoros kadılar zîde fazluhümâ tevkī‘- i refî‘-i hümâyûn vâsıl olıcak ma‘lûm olalar ki merhûm ve mağfûrun-leh babam Sultan Selim Hân aleyhi’r-rahmetü ve’l-gufrânın taht-ı kazânızda vâki‘ olan evkāfından hâsıl olan öşr-i terekeden zahîre için mahrûse-i İstanbul’a gönderilmesi lâzım ve mühim olmağın buyurdum[ki] hükm-i şerîfimle mefharu’l-emâsil Yusuf nâm kulum vardıkda taht-ı kazânızda olan evkāf-ı mezbûre re‘âyâsından öşr-i terekeden hâsıl der-zimem ve der-anbâr olan terekeleri kiyas gördüğünüz üzere kulum ma‘rifeti ile gemilere tahmîl ettirip evkāf-ı mezbûre zâbıtları ile kulumla mahrûse-i İstanbul’a göndere ki narh-ı rûzî üzere İstanbul’da füruht oluna ve her gemi ile ne mikdâr buğday ve arpa gönderilir ve kangı re’is gemisi ile irsâl olunduğun vukû‘ı üzere yazıp dergâh-ı mu‘allâma arz edesiz, ki ma‘lûm ola, ammâ bu bahâne [ile] âhar yere tereke füruht olunmakdan hazer edesiz şöyle bilesiz alâmet-i şerîfe arz edesiz. Tahrîren fi’l-yevmi’s-sâlis ve’l- ışrîn şehri Ramazâni’l-mübârek min şuhûri sene isnâ ve sittîn ve tis‘a mie.