Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 290 Hüküm no: 725 Orijinal metin no: [72a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Gazi’nin tasarruf ettiği yerlere amcazâdelerinden Hızır’ın el koymak istediği Kıdvetü’l-kuzât ve’l-hükkâm, ma‘denü’l-fazl ve’l-kelâm, mümeyyizü’l-halâl ve’l-harâm Mevlânâ Gekvize kadısı dâme-fazluhû tevkī‘- i refî‘-i hümâyûn vâsıl olıcak ma‘lûm ola ki: Taht-ı kazânda Kurdköyü nâm karyeden dârende-i fermân-ı vâcibü’l-iz‘ân Seyyid Gāzi nâm kimesne bâb-ı sa‘âdet-me‘abıma gelip şöyle arz eyledi ki, bundan akdem Ali ve Hızır nâm ammuzâdeleri gemiye girer olduklarında mezkûr karyeye tâbi‘ müşâ‘ ve müşterek mutasarrıf oldukları ataları bir yerlerini kimesneye ısmarlamayıp koyup gidip yer boz ve mu‘attal kalmalı olıcak o târîhte sâhibi timar olan kimesnenin izni [ve] icâzeti ile biz zirâ‘at ve tasarruf eyleyip mezkûrlar müddet-i medîde ve ahd-i ba‘îd gelmeyip yerler on yıldan ziyâde takrîben yirmi yıl mikdârı zamân geçip bunun tasarrufunda kalıp bu zirâ‘at ve harâset eyleyip hukūk ve rüsûmunu sâl be sâl sâhibi timar olanlara edâ eyleyip bu kadar zamândan berî kâdîm-i tasarrufunda yerleri iken hâliyâ mezkûr Hızır nâm kimesne gāibden gelip zikr olunan yerler için sâbıkan atalarımızdan kalmış yerlerimizdir, deyû da‘vâ edip ba‘zına kendi hissemdir deyû zabt ve tasarruf etmek isteyip ba‘zı için dahi mezkûr Ali’nin idi ol gark oldu evlâd-ı zükûrdan kardeşinden kimesnesi kalmayıp atam ve dedem yerleridir onun hissesin dahi sipâhiden aldım deyip dahl edip buna ol yerleri tasarruf etmeğe komaz imiş, imdi buyurdum ki ba‘de ihzâru’l-husamâ bu husûs onat vechile hak üzere teftîş eyleyip göresin kazıyye arz eylediği gibi olup vâki‘ ol yerleri bu zikr olunan târihten berî on yıldan ziyâde vech-i meşrûh üzere asâleten tasarruf edip hukūk ve rüsûmunu sipâhiye bu edâ edegelmiş ise bi-hasebi’l-kānûn ol yerler bunun olur, hâliyâ mezkûr kimesne gelip on yıl geçmiş yer da‘vâsın edip ve ol vechile kānûna muhâlif nizâ‘ eyleyip bunun on yıldan ziyâde tasarrufunda olan yerine te‘addî edip tasarrufuna mâni‘ olur ise men‘ ve def‘ edip hilâf-ı kānûn ettiği da‘vâsın istimâ‘ etmeyip tasarruf ettiği kâdîm-i yerlerini buna kemâkân tasarruf ettiresin temerrüd edenleri seğidip ziyâde inâd edenleri yazıp arz eyliyesin ki kimesneye şer‘ ve kānûna muhâlif iş ettirmeyesin şöyle bilesin. Tahrîren fî evâili şehri Recebi’l-mürecceb sene isneteyn? ve hamsîn ve tis‘a mie.