Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 303 Hüküm no: 762 Orijinal metin no: [76a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todora bt. Kefale Yorgi’nin, evini Nikola b. Dimitri’ye sattığı Vech-i tahrîr-i sicil budur ki Karye-i Çengel’den Todora bt. Kefale Yorgi meclis-i şer‘de Kaçaroz Nikola b. Dimitri muvâcehesinde ikrâr ve i‘tirâf edip dedi ki karye-i mezbûrda deryâ kenarında babam Kefale Yorgi verdiği çardak evi ve altı ahır ile tevâbi‘ ve levâhıkı ile mahdûd bir cânibi Manol b. Papaz ve bir taraf deryâya ve bir taraf tarîk-ı âm ve bir taraf sekiz zirâ‘ yeriyle gene Manol b. Papas yerine muttasıldır işbu hudûd zikr olunan evi işbu Nikola’ya on bin akçeye bey‘ ettim kabz ve teslîm-i mebî‘ ettim dedikde mezbûr Nikola vicâhen tasdîk ettikde sıhhat-i akd-i bey‘a hükm olundu ki bi’t-taleb kayd-ı sicil olundu. Vaka‘a’t-tahrîr fî evâhiri Zilhicce sene 962. Şuhûdü’l-hâl: Mustafa b. Mehmed, Ramazan b. Hüseyin, Kara Yusuf b. Abdullah, Duka b. Tıranoz, Dimitri b. Tıranoz, Kosta b. Odul, Manol b. Doğan, Kubakti b. Manol, Yani b. Andriya, Ganil b. Vâsıl, Nikola b. Yani, Dimitri b. İflahoz ve gayruhüm