Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 82 Hüküm no: 24 Orijinal metin no: [2b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Hasan’ın Bursa’ya götürüp getirdiği kadının çalınan eşyaları Vech-i tahrîr-i hurûf oldur ki Mahmiye-i Üsküdar’dan Mehmedpaşa mahallesinden Ali b. Hasan nâm kimesneyi Üsküdar Zaîmi Alagöz Bey cânibind [en] Ases Ali ve Yasakçı Turgut Yeniçeri nâm kimesneler meclis-i [şer‘a] ihzâr edip dediler ki mezbûr Ali bir avreti kayığıyla Bursa’ya iletip getirip avreti bunda soyup avret bize gelip şikâyet edip biz dahi vardık mezbûr Ali’ye avreti niçin soydun getir esbâbını avrete verelim ve kavga bitsin dediğimizde merkūm Ali işbu bir ak bohça ile bir kırmızı muhayyer kaftan ve bir beyaz sâde kaftan çapraz düğmeli ve bir çift siyah kutnî yelek ve bir al nezkeb ve bir mavi don bu cümle esbâbı getirip bize verdi dediklerinde mezbûr Ali’ye suâl olundukda bi’l-muvâcehe inkâr edip vech-i meşrûh üzere mâ hüve’l-vâkı‘ gıbbe’t-taleb kayd-ı sicil olundu. Tahrîren fî evâili şehri Zilhicce sene 970. Şuhûdü’l-hâl: Mevlânâ Abdi Çelebi b. Lütfi ve Ramazan Bey b. Hüseyin ve Mehmed Çelebi b. Ahmed ve Kutbeddîn b. Mahmud ve Nuh Reîs b. İskender ve Memi b. Hüseyin ve Mustafa b. Mehmed ve Hüseyin el-muhzır ve gayruhum mine’l-hâzırîn