Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 89 Hüküm no: 41 Orijinal metin no: [4a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer b. Hüsam’ın karısı, amcasının kızı ve cariyelerinin iyi insanlar olduklarının ispat edilmesi Vech-i tahrîr-i hurûf oldur ki Fahrü’l-emâcid ve’l-ekârim Ali Bey hazretleri cânibinden gelen hâslar subaşısı olan Abdurrahman Çelebi meclis-i şer‘a gelip nefs-i Üsküdar’da Mirahor mahallesinde sâkin olan Cafer b. Hüsam nâm kimesnenin hâtunu Hanife bt. Hasan Bey ve mezbûrenin ammisinin ümmü’l-veledi olan Hümâ bt. Abdullah ve câriyeleri Kâmile ve Müyesser ve Rânâ nâm hâtunlarının keyfiyet-i ahvâl [i] mahalle-i mezbûre ahâlîsinden istifsâr olunmasın taleb eylediklerinden mezbûrânın ahvâli istifsâr olundukda mahalle-i mezbûre imâmı olan Tâceddin Halîfe b. Ali ve sâir ahâlîsinden Halil b. Mustafa ve Kasım Bey b. Abdullah ve Mehmed b. Ali ve Mehmed b. Şaban ve Yunus b. İlyas nâm kimesneler şöyle haber verip dediler ki mezbûrân hâtunlar dört yıl mikdârı dâire-i mahallemizdedir mestûre hâtunlardır yaramazlıklarını görüp ve istimâ‘ etmedik ve mezbûrân câriyeler dahi bundan giden câriyelerdir deyu hâtunlarımız haber verdiler ammâ hâtunları kendimiz bi-şahsihâ biliriz iyi hâtunlardır dedikleri alâ mâ hüve’l-vâkı‘ gıbbe’t-taleb kayd-ı sicil olundu. Tahrîren fî evâsıtı şehri Zilhicceti’ş-şerîfe min şuhûri sene 970. Şuhûdü’l-hâl: Mevlânâ Muslihiddin Efendi b. Mevlânâ Hüsam ve Mevlânâ Osman Halîfe b. Hasan ve Alagöz Bey b. Abdullah ve Hasan Bey b. Abdullah ve Mustafa b. Mehmed ve Nasuh b. Hüseyin ve gayruhum mine’l-hâzırîn