Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 91 Hüküm no: 48 Orijinal metin no: [4b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Alagöz Bey b. Abdullah’ın mîrî dediği yerin Memi b. Şaban’a babasından kaldığı Sebeb-i tahrîr-i kitâb ve mûcib-i tastîr-i hitâb oldur ki Hâlâ Üsküdar Zaîmi Alagöz Bey b. Abdullah Salacak mahallesinden Memi b. Şaban nâm kimesneyi meclis-i şer‘a ihzâr edip üzerine takrîr-i kelâm edip dedi ki, Mahmiye-i mezbûrda Âsafiye hamâmı kurbunda vâkı‘ olan bir kıt‘a yer ki hudûdu bir cânibi vakf-ı Âsafiye’ye ve bir cânibi Memi b. İlyas dükkânına ve bir cânibi tarîk-ı âmma ve bir cânibi başhâneye muttasıldır işbu hudûd-ı erba‘a ile mahdûde olan yer mîrîdir senin mülkündür ben mîrî için zabt ederim dedikde, mezbûr Memi cevâb verip dedi ki, zikr olan yer benim mülkümdür babamdan intikāl etmişdir babamın evvel yerin üzerinde damı var idi dedikde, müşârunileyh Alagöz Bey inkâr edip mezbûr Memi’den da‘vâsına mutâbık beyyine taleb olundukda udûl-i müslimînden Yusuf b. Hamza ve Hüseyin b. Ali mezbûr Memi’nin da‘vâsına mutâbık edâ-i şehâdet edip dediler ki zikr olunan yer mezbûr Memi’nin babasından intikāl etmiş mülkdür babasının üzerinde evvel damı dahi var idi biz şâhidiz şehâdet ederiz dediklerinde mezbûrânın şehâdetleri ba‘de’t-tezkiyeti’ş-şer‘iyye hayyiz-i kabûlde vâkı‘ olup mûcebince hükm olunup mâ hüve’l-vâkı‘ ber-sebîl-i temessük ketb olunup yed-i tâlibe vaz‘ olundu ki lede’l-hâce temessük edine. Tahrîren fî evâsıtı şehri Zilhicce sene 970. Şuhûdü’l-hâl: Gökçe Ahmed b. Pîrdede ve Hüseyin b. Murad ve Mustafa b. Pîr Veli ve Ali b. Behram ve Ahmed [b.] Hüseyin ve gayruhum mine’l-hâzırîn