Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 94 Hüküm no: 55 Orijinal metin no: [5a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Elhac Mustafa’nın, Süleyman b. Pirdede’den aldığı merkebin kusurlu olması Vech-i tahrîr-i hurûf oldur ki Süleyman b. Pîrdede meclis-i şer‘de Mehmed b. Elhâc Mustafa mahzarında da‘vâ kılıp dedi ki, mezbûr Mehmed bana bir merkeb sattı yüz on akçeye ayıbı zâhir oldu dedikde, mezbûr Mehmed’e suâl olundukda cevâb verip dedi ki, mezbûr Süleyman merkebi min-külli ayb kabûl eyledi dedikde, mezbûr Süleyman inkâr edip mezkûr Mehmed’in da‘vâsına mutâbık beyyine taleb olundukda udûl-i müslimînden Cafer b. İlyas ve Ahmed b. Mahmud ve Mustafa b. Receb edâ-i şehâdet edip dediler ki mezbûr Süleyman zikr olunan hımarı min-külli ayb nasıl olursa olsun kabûl etti biz şâhidiz şehâdet ederiz dediklerinde mezbûrânın şehâdetleri ba‘de’t-tezkiye hayyiz-i kabûlde vâkı‘ olup mûcibine hükm olunup gıbbe’t-taleb kayd-ı sicil olundu. Tahrîren fî evâsıtı Zilhicce sene 970. Şuhûdü’l-hâl: Süheyl Mütevellî b. Abdullah ve Sefer b. Yunus ve Mehmed Çelebi b. Hasan ve Nasuh b. Hamza ve gayruhum