Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 98 Hüküm no: 66 Orijinal metin no: [5b-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Şaduman’ın, Mehmed b. Veli’yi kiraladığı Vech-i tahrîr-i hurûf oldur ki Mahrûse-i İstanbul’da sâkin kazâ-i Tosya’dan Mehmed b. Şâduman meclis-i şer‘de yine kazâ-i mezbûreden Mehmed b. Veli nâm gulâm-ı emred mahzarında da‘vâ edip dedi ki, mezbûr Mehmed mahrûse-i mezbûre mahkemesinde hüccet yazdırdığım gün mahkeme-i şerîfede Müslümanlar mahzarında on sikke filori verip mezbûr Mehmed’in nefsini iki seneye icâreye aldım deyu hüccet ibrâz edip târîh-i hüccet evvel-i Zilka‘de [de] yazılıp mezbûr Mehmed’e suâl olundukda cevâb verip dedi ki, bana altın vermediler mücerred muvâsıl edip hele ki ettim deyu ikrâr ettiler ben dahi ikrâr edip bana filori vermediler deyu inkâr edip mezbûr Mehmed b. Şâduman’dan da‘vâsına mutâbık beyyine taleb olundukda Osmancıklı Âbid b. Abdullah nâm kimesne şehâdet için hâzır olup hüccet ketb olunduğu gün mâh-ı Zilka‘de’nin altıncı gününün (…) mezbûr Mehmed on filori verdi ben şâhidim deyip ve Terzi Veli b. Kolfal nâm kimesne dahi mezbûr Mehmed’e evvelâ on sikke filori verdi deyip sâniyen rücû‘ edip vericek oldu deyip mezbûrûnun birbirini münâkız kelimâtı alâ mâ hüve’l-vâkı‘ gıbbe’t-taleb kayd-ı sicil olundu. Tahrîren fî evâsıtı Zilhicce sene 970. Şuhûdü’l-hâl: Mevlânâ Murad Efendi b. Ali et-Tosyevî ve Mevlânâ Nazar Efendi b. Elhâc Mehmedî el-merkūme ve Elhâc Ahmed b. Abdullah ve İbrahim b. Mustafa ve Pervâne Bey b. Abdullah ve Zekeriya b. Kasım ve Hızır b. İdris ve Veli Çelebi b. Alagöz Bey ve gayruhum mine’l-hâzırîn