Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 106 Hüküm no: 88 Orijinal metin no: [7b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Hamza’nın, Fazlullah b. İsa Fakih’teki alacağının bir miktarına karşılık atını aldığı Vech-i tahrîr-i hurûf oldur ki Şehzâde-i civân-baht -tâbe bekâhu- hazretlerinin cânib-i şerîflerinden hâssa-i hümâyûnlarında Üsküdar ve Yoros kazâsında vâkı‘ olan yere yava-i kefereden ve beytülmâl ve cürm-i cinâyetin ber vech-i iltizâm emîn olan İbrahim b. Hamza meclis-i şer‘de Fazlullah b. İsa Fakih muvâcehesinde bi-tav‘ihî ikrâr-ı sahîh-i şer‘î ve i‘tirâf-ı sarîh-i mer‘î kılıp dedi ki, Üsküdar mahsûlün sene ihdâ ve seb‘îne ve tis‘a-mi’ede mezbûr Fazlullah’a altı [bin] akçeye vermiş idim sene-i mezbûre mahsûlünden mezbûr Fazlullah’dan altı yüz akçe bir doru bârgirin aldım mezbûrun zimmetinde beş bin dört yüz akçeden mâ‘adâ akçem kalmadı dediği i‘tirâfı gıbbe’t-taleb kayd-ı sicil olundu. Tahrîren fî 22 Zilhicce sene 970. Şuhûdü’l-hâl: Mevlânâ Kasım Halîfe b. Ahmed ve Alagöz Bey b. Abdullah ve Ahmed Çelebi b. Hasan ve Nasuh el-muhzır ve gayruhum