Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 115 Hüküm no: 112 Orijinal metin no: [9a-9] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vârissiz ölen Sefer b. Hızır’ın yerlerinin Manol v. Savadinos’a satılması Sebeb-i tahrîr-i kitâb ve mûcib-i tastîr-i hitâb oldur ki Mahmiye-i Üsküdar’a tâbi‘ Soğanlık nâm karyenin sipâhisi olan fahrü’l-emâsil ve’l-akrân Kara Bey b. Abdurrahman meclis-i şer‘de karye-i Pendik’den Manol v. Savadinos nâm zimmî muvâcehesinde bi-tav‘ihî ikrâr-ı sahîh-i şer‘î ve i‘tirâf-ı sarîh-i mer‘î kılıp dedi ki, karye-i mezbûrda ra‘iyyetim olan Sefer b. Hızır nâm kimesne vefât edip evlâd-ı zükûru ve karındaşı kalmayıp kānûn-ı pâdişâhî üzere yerleri tapuya müstehak olduğu ecilden mezbûr Manol’a merhûm Sefer’in yirmi sekiz akçe kulluklu yerlerini ki hudûdları inde’l-ahâlî ma‘lûmedir iki bin üç yüz akçe resm-i tapusun alıp verdim ki ekip biçip öşrün ve kulluğun kānûn üzere edâ edip tasarruf eyleyip kimesne mâni‘ ve müzâhim olmaya dedikde, mukırr-ı mezkûrun i‘tirâfını vicâhen ve şifâhen mezbûr Manol dahi tasdîk edip (…) mâ hüve’l-vâkı‘ ber sebîl-i temessük ketb olunup yed-i tâlibe vaz‘ ve def‘ olundu ki lede’l-hâce temessük edine. Tahrîren fî evâhiri şehri Zilhicceti’ş-şerîfe sene 970. Şuhûdü’l-hâl: Hayreddin b. Ahmed ve Hüseyin Çelebi b. Hasan ve Yusuf b. Abdi Hoca ve Mustafa b. Mehmed ve gayruhum