Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 117 Hüküm no: 116 Orijinal metin no: [9b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine ve Rukiye’nin anne ve babalarından kalan miras için kardeşleri Mehmed b. Kara İlyas’la anlaşmaları Sebeb-i tahrîr-i kitâb sıhhat-ı nisâb budur ki Nefs-i Üsküdar sâkinelerinden Emine ve Rukiye nâm hâtunlar babaları fevt İlyas b. İdris nâm kimesneden ve vâlideleri Paşa Bula bt. Musa nâm hâtundan intikāl eden mevârîs-i şer‘iyyeye müte‘allik on beş yıldan ziyâde zamân mürûr etmiş da‘vâlarını görmek için kazâ-i Elbistan’dan ma‘zûl Mevlânâ Abdurrahman ve Üsküdar kadısı Mevlânâ Muhyiddin’e ve bu fakîre fermân-ı kazâ-i cereyan vârid olmağın nefs-i Üsküdar’dan akd-i meclis kılınıp tesviye-i husamâ kılındıkda mezbûretân Emine ve Rukiye li-eb ve ümm karındaşları Mehmed b. Kara İlyas’dan babaları mârrü’z-zikr Kara İlyas’dan intikāl eden muhallefâtın cümlesini mezkûr Mehmed kabz edip nice akardan ve nükûddan ve esâs-ı vârideden kat‘â nesne vermemişdir hisse-i şer‘iyyemiz taleb ederiz dediklerinde muslihûn araya girip es-sulhu hayrun ile amel edip mezkûretân Emine ve Rukiye müşârunileyh Mehmed muvâcehesinde şöyle takrîr-i kelimât edip dediler ki kasaba-i mezkûre mahallâtından Kebçe mahallesinde vâkı‘ vâlidemizden intikāl etmiş tarafeyni Abdullah Hoca b. Yahşi mülküyle ve tarîk-ı âmla ve Abdi b. Hamza mülküyle mahdûd bir evi ve sofayı müştemil menzilin Doğancı Yusuf b. Hacı nâm kimesneler mezbûre Paşa Bula’dan iştirâ ettim dediği mevzi‘den mâ‘adâsını biz ikimiz iştirâk üzere alıp kabz edip ve on iki sahîhü’l-ayâr tâmmü’l-vezn altını bedel-i sulh deyu mezkûr Mehmed’e teslîm edip meblag-ı mezkûrdan ve sâir babamızdan ve vâlidemizden intikāl eden akardan ve nükûddan ve gayrı cüz’î ve küllî esbâbdan zimmetini ibrâ ve iskāt ettik eğer min ba‘d bizden veyâ vekîlimizden da‘vâ ve nizâ‘ ve husûmet vâkı‘ olur ise inde’l-hükkâm istimâ‘ olunmaya dediklerinde mukarrun lehü’l-mezbûr Mehmed mukırretân-ı mezkûretânın vech-i meşrûh üzere kelimâtlarını tasdîk ve takrîrlerini tahkīk edip şöyle takrîr-i kelâm kılıp dedi ki, mezkûretân kızkarındaşlarıma bi-tarîki’s-sulh menzil-i mezkûru teslîm edip bedel-i sulh vâkı‘ olan on iki sikke sahîhü’l-ayâr altını alıp kabz edip menzil-i mezkûrdan mezbûretân kızkarındaşlarımızın zimmetlerini ibrâ ve iskāt ettim ve menzil-i mezkûr ki mastûrü’l-hudûddur ânı Doğancı Yusuf el-mezkûrîn mezkûre Paşa Bula’dan iştirâ ettim dediği inde’l-ahâlî ma‘lûmü’l-hudûd mevzi‘den mâ‘adâsını zikr olunan kız karındaşlarımıza teslîm ettim husûs-ı mezkûr için benden veyâ vekîlimden da‘vâ ve nizâ‘ ve husûmet vâkı‘ olur ise inde’l-hükkâm mesmû‘ olmaya dedikde, mukarrun lehüme’l-mezbûretân mukırr-ı mezkûrun vech-i meşrûh üzere kelimâtını tasdîk ve takrîrini tahkīk edip kıbel-i şer‘den mezkûr hâl taleb olunmağın işbu vesîka ketb olunup tâlibetân-ı mezkûretân yedlerine vaz‘ ve def‘ olundu ki vakt-i hâcetde ihticâc edeler. Cerâ zâlike ve hurrire fî evâhiri Zilhicceti’l-mübâreketi li-sene seb‘îne ve tis‘a-mi’e. Şuhûdü’l-hâl: Hasan Bey b. Abdullah ve Cafer b. İlyas ve Hayreddin b. Ayas ve İsmail b.Yakup ve Mustafa b. Mahmud ve Hüseyin b. Hasan ve Süleyman b. Mahmud ve Sinan Bey b. Abdullah ve Gökçe Ahmed b. Pîrdede ve Elhâc Süleyman b. Mehmed ve gayruhum mine’l-hâzırîn