Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 124 Hüküm no: 136 Orijinal metin no: [11b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kara İlyas kızı Emine Hatun’un babası ve anasından kalan bahçe hissesini sattığı Vech-i tahrîr-i sicil budur ki Mahmiye-i Üsküdar’da Kebçe mahallesinden Kara İlyas kızı Emine Hâtun’un tarafından bey‘-i âtiyeye Mevlânâ Abdi Çelebi b. Elhâc Lütfi ve Elhâc Süleyman ve Elhâc Mehmed şehâdetleri ile vekâlet-i mutlaka-i şer‘iyyesi sâbite olan zevci Hasan b. Ali meclis-i şer‘de mahalle-i mezbûreden Abdi b. Hamza mahzarında bi-tav‘ihî ikrâr-ı sahîh-i şer‘î ve i‘tirâf-ı sarîh-i mer‘î kılıp dedi ki, mezbûre müvekkilem zevcem Emine’nin babası Kara İlyas ve anası Paşa Bula’dan irsle intikāl eden bir kıt‘a bahçeden hisse-i şâyi‘âsın ki hudûdu iki tarafı Hoca Abdullah b. Bahşi mülküne ve bir tarafı tarîk-ı âmma ve bir tarafı müşteri-i mezbûr mülküne muttasıldır işbu hudûd ile mahdûd olan bahçeden hisse-i mezbûrenin cemî‘-i tevâbi‘ ve levâhıkıyla bi-tarîki’l-vekâle mezbûr Abdi’ye elli dokuz sikke tâmmü’l-vezn sahîhü’l-ayâr filoriye bey‘-i bât ile bey‘ edip semen-i merkūmu mezbûr Abdi yedinden bi’t-tamâm kabz edip mübî‘-i mezkûru mezbûr Abdi’ [ye] bi’l-vekâle teslîm-i şer‘iyle teslîm ettim min ba‘d mezbûrenin zikr olan yerde da‘vâsı ve nizâ‘ı yokdur şimden geri keyfemâ yeşâ mutasarrıf ola dedikde, mukırr-ı mezkûrun i‘tirâfına vicâhen ve şifâhen mezbûr Abdi dahi tahkīk ve tasdîk edip sıhhat-ı bey‘a hükm olunup mâ hüve’l-vâkı‘ ber sebîl-i temessük ketb olunup yed-i tâlibe vaz‘ olundu ki lede’l-hâce ihticâc edine. Tahrîren fi’l-yevmi’s-sânî min şehri Muharremi’l-harâm sene ihdâ ve seb‘îne ve tis‘a-mi’e. Şuhûdü’l-hâl: Nebi Halîfe b. Hasan ve Mehmed b. Ahmed ve İbrahim b. Abdi ve Nasuh b. Hamza ve Memi b. Şaban ve Memi b. Elhâc Ali ve Kara Ali ed-Debbâğ ve gayruhum mine’l-hâzırîn