Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 136 Hüküm no: 170 Orijinal metin no: [14a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Ali’nin bağını Mustafa Paşa’ya sattığı Sebeb-i tahrîr-i kitâb ve bâ‘is-i tastîr-i hitâb oldur ki Mahmiye-i Üsküdar’da Mîriâhur mahallesinden Hüseyin b. Ali meclis-i şer‘de fahrü’l-e‘âzım ve’l-efâhım Hazreti Mustafa Paşa -yesserallâhu mâyeşâ-nın cânib-i şerîflerinden fahrü’l-emâsil Ali Çavuş [b.] Abdurrahman mahzarında bi-tav‘ihî ikrâr-ı şer‘î edip dedi ki, hâliyâ mülkümde ve taht-ı tasarrufumda vâkı‘ olan bir kıt‘a mülk bağımı ki mahdûddur bir cânibi tarîk-ı âm bir cânibi Hacı Halil bağı ve bir cânibi Hasan b. Abdullah bağı ve bir cânibi Sabuncu Süleyman bağıyla zikr olan bağımı cemî‘-i hudûdu ve hukûku ve tevâbi‘i ve levâhıkı ve eşcâr-ı müsmire ve gayr-ı müsmiresiyle müşârunileyh sâhibü’s-sa‘âde hazretlerine kırk yedi sikke tâmmü’l-vezn ve sahîhü’l-ayâr filoriye bey‘-i bât ile bey‘ edip mûmâileyh Ali Çavuş yedinden meblag-ı mezbûru bî-kusûr kabz edip mebî‘-i mezkûru müşârunileyh hazretlerine teslîm-i şer‘iyle teslîm ettim şimden geri keyfemâ yeşâ mutasarrıf ola dedikde, mukırr-ı mezkûrun i‘tirâfını vicâhen ve şifâhen müşârunileyh sâhibü’s-sa‘âde hazretlerinin cânib-i şerîflerinden mûmâileyh Ali Çavuş tasdîk ve tahkīk edip sıhhat-ı bey‘a hükm olunup mâ hüve’l-vâkı‘ ber sebîl-i temessük ketb olunup yed-i tâlibe vaz‘ olundu lede’l-hâce ihticâc edine. Tahrîren fî evâhiri şehri Zilhicceti’ş-şerîfe sene seb‘îne ve tis‘a-mi’e. Şuhûdü’l-hâl: Alagöz Bey ve Şaban b. Mehmed ve Kasım [b.] Ahmed ve Süleyman b. Mahmud ve Semerci Nasuh b. Abdullah ve Hacı Ahmed b. Hasan ve Mustafa Bey b. Abdullah ve Mustafa b. Mehmed ve gayruhum