Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 147 Hüküm no: 200 Orijinal metin no: [16a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Hasan’ın babasından kalan ev hissesini kardeşi Ali’ye sattığı Sebeb-i tahrîr-i kitâb-ı mer‘î ve bâ‘is-i tastîr-i hitâb-ı şer‘î oldur ki Mahmiye-i Üsküdar’da Kebçe mahallesinden Hüseyin b. Hasan karındaşı Ali mahzarında bi-tav‘ihî ikrâr-ı sahîh-i şer‘î ve i‘tirâf-ı sarîh-i mer‘î kılıp dedi ki, mahalle-i mezbûrede vâkı‘ olan babamızdan intikāl eden bir çatma ev ki önünde sundurması ve su kuyusu ve fırını ve bahçesiyle ki hudûdu iki cânibi tarîk-ı âmma ve iki cânibi Mustafa b. Mehmed mülküne muttasıldır işbu hudûd ile mahdûde olan mülkümüzde olan nısf-ı hisse-i şâyi‘imi mezbûr karındaşım Ali’ye üç bin beş yüz râyicü’l-vakt akçeye bey‘-i bât ile bey‘ edip meblag-ı merkūmu mezkûr Ali yedinden bi’t-tamâm ve’l-kemâl kabz edip mebî‘-i mezkûru mezbûr Ali’ye teslîm-i şer‘iyle teslîm ettim, şimden geri zikr olan mülkde da‘vâm ve nizâ‘ım yokdur eğer edersem inde’l-hükkâm mesmû‘ ve makbûl olmaya keyfemâ yeşâ mutassarrıf ola dedikde, mukırr-ı mezkûrun i‘tirâfını vicâhen ve şifâhen mezbûr Ali tasdîk ve tahkīk edip sıhhat-ı bey‘a hükm olunup mâ hüve’l-vâkı‘ ber sebîl-i temessük ketb olunup yed-i tâlibe vaz‘ ve def‘ olundu ki lede’l-hâce ihticâc edine. Tahrîren fî evâsıtı Muharremi’l-harâm sene ihdâ ve seb‘îne ve tis‘a-mi’e. Şuhûdü’l-hâl: Mevlânâ Kasım Halîfe b. Ahmed ve Sinan Halîfe b. Udul ve Murad Halîfe b. Abdullah ve Nebi Halîfe b. Hasan el-Mü’ezzin ve Seydî Halîfe b. Hasan ve Mustafa b. Hüseyin ve Alagöz b. Abdullah ve Pervâne Bey b. Abdullah ve Hüseyin Bey b. Abdullah ve Mustafa b. Veli ve Mustafa b. Mehmed ve Hüseyin b. Behram