Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 148 Hüküm no: 204 Orijinal metin no: [16b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Muslihiddin’in, Hüseyin b. Hasan’a bıçak çekip karısına küfür ettiği Vech-i tahrîr-i hurûf oldur ki Mahmiye-i Üsküdar’da Kebçe mahallesinden Hüseyin b. Hasan meclis-i şer‘de Hamza Fakih mahallesinden Ahmed b. Muslihiddin mahzarında da‘vâ edip dedi ki, mezbûr Ahmed bana bıçak çıkarıp avretime cimâ‘ lafzıyla şetm eyledi hakkım taleb ederim dedikde, mezbûr Ahmed’e suâl olundukda inkâr edip mezbûr Hasan’ın da‘vâsına mutâbık beyyine taleb oldukda udûl-i müslimînden Mevlânâ Muhyiddin Efendi b. Nasrullah ve Sefer b. Mehmed nâm kimesneler mezbûr Hüseyin’in da‘vâsına mutâbık edâ-i şehâdet edip dediler ki mezbûr Ahmed mezbûr Hüseyin’e bıçak çıkarıp avretine cimâ‘ lafzıyla şetm eyledi biz şâhidiz şehâdet ederiz dedikleri ba‘de’t-tezkiyeti’ş-şer‘iyye hayyiz-i kabûlde vâkı‘ olunup gıbbe’t-taleb kayd-ı sicil olundu. Tahrîren fî evâsıtı Muharremi’l-harâm sene 971. Şuhûdü’l-hâl: Murad Halîfe b. Abdullah ve Ferruh Mütevellî b. Abdullah ve Vehbî b. Memi ve Ali b. Sinan Halîfe ve Nasuh el-muhzır