.:: İstanbul Kadı Sicilleri ::.


Üsküdar Mahkemesi 26 Numaralı Sicil (H. 970-971 / M. 1562-1563)
cilt: 7, sayfa: 174
Hüküm no: 276
Orijinal metin no: [20b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Çamlıca yakınlarında yaralı olarak bulunan ve daha sonra ölen kişinin keşfedilmesi

Vech-i tahrîr-i hurûf oldur ki Mahmiye-i Üsküdar’a tâbi‘ merhûm ve magfûrun leh Abdullah Ağa Evkāfı’ndan İstavros nâm vakıf karyede nâzır olan Turgut b. Hızır meclis-i şer‘-i şerîfe gelip dedi ki karye-i mezbûrenin şarkî cânibinden Çamlıca nâm mevzi‘ kurbunda Hüseyin nâm kimesne akşamın çiftten gelirken bir mecrûh kimesne görmüş üzerine varılıp ahvâli keşf olup görülmesin taleb ederim dedikde, Müslümandan ve kefereden cem‘-i kesîr ile üzerine varılıp zikr olan mevzi‘ kurbunda karye-i mezbûrenin dağdan funda getirdikleri arabaları yolu üstünde bir bayır tepede hiç bir karyeden avaz işitilmez yerde bir mecrûh kimesne yatar bulunup iki gözleri altından külünk cerâhati eseri olup köse sakallı orta boylu kimesne olup esbâbı bir sürmâyî Selânik çukası ve bir çalma ve bir eski menevrek ve bir kırmızı papuç ve bir eski ak aba zıbını ve bir kanlı gömleği ile hayâtda iken üzerine varılıp keyfiyet-i ahvâli suâl olundukda cevâba kādir olmayıp cârih nâ-ma‘lûm oldu bir sa‘at geçmeden vefât eyleyip vech-i meşrûh üzerine keşfi alâ mâ hüve’l-vâkı‘ gıbbe’t-taleb kayd-ı sicil olundu. Tahrîren fî evâsıtı şehri Saferi’l-muzaffer sene 971.


Şuhûdü’l-hâl: Rıdvan Bölükbaşı b. Abdullah ve Hüseyin Çavuş b. Hasan an çavûşân-ı hazret-i Mehmed Paşa ve Müstecab b. Mustafa der Üsküdar ve Yusuf Yeniçeri b. Abdullah der Üsküdar ve Mustafa b. Hasan ve Hasan b. Ali ve İsa b. Yakup ve Ömer b. Veys el-Câbi ve Mustafa b. Mehmed ve gayruhum mine’l-hâzırîn