Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 175 Hüküm no: 279 Orijinal metin no: [20b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdi b. Hani Bey’in eşyalarını çalmakla suçlanan Orhan b. Mahmud ve Mustafa b. Resul’ün iddiaları reddetmesi Vech-i tahrîr-i hurûf oldur ki Abdi b. Hanî Bey nâm kimesne Orhan b. Mahmud ve yoldaşı Mustafa b. Resul nâm kimesneleri meclis-i şer‘a ihzâr edip üzerlerine takrîr-i merâm edip dedi ki, dün gece yatsı vaktinde bir kimesne bana çörek ile tatlı yedirip ba‘zı esbâbım almış mezbûr Orhan’a benzer dedikde, mezbûra suâl olundukda ben bugün İstanbul’dan geçtim deyip gece İstanbul boğazında gemide yattım dedikde, ta‘rîf olunup kendine ve yoldaşı Mustafa’ya suâl olunup ikisinin cevâbı biribirine mutâbık olup ba‘dehû mezbûrânın kendileri ve esbâbları aranıp hiçbir eser zâhir olmayıp mezbûr Abdi’den mezbûr Orhan sana çörek verdiğine beyyine taleb olundukda âciz olup hasmının yemînin taleb eyledikde mezbûrâna mezbûr Abdi’ye çörek ile tatlı vermediklerine yemîn billâh verilip mâ hüve’l-vâkı‘ gıbbe’t-taleb kayd-ı sicil olundu. Tahrîren fî evâsıtı Saferi’l-hayr sene 971. Şuhûdü’l-hâl: Mevlânâ Tâceddin Halîfe, Ahmed b. Burak Çelebi karye-i Kadı’dan, Mehmed b. Hüseyin, Ahmed Çelebi b. Davud ve Nasuh b. Hamza ve gayruhum mine’l-hâzırîn