.:: İstanbul Kadı Sicilleri ::.


Üsküdar Mahkemesi 26 Numaralı Sicil (H. 970-971 / M. 1562-1563)
cilt: 7, sayfa: 184
Hüküm no: 306
Orijinal metin no: [22b-6]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed’in çaldığı eşyaların Mehmed b. Mahmud’a ait olduğu

Vech-i tahrîr-i hurûf oldur ki Mahrûse-i Bursa’dan Abdal Mehmed mahallesinden Mehmed b. Mahmud nâm kimesne meclis-i şer‘de Üsküdar Zaîmi Alagöz b. Abdullah mahzarında da‘vâ edip dedi ki, Mehmed nâm hırsızın elinden aldığın işbu siyah kırmızı saçaklı çuka ve bir mavi kutnî ve bir mavi mukaddem kuşak ve bir ak sâde benimdir mülkümden sirkat olundu dedikde, mezbûr subaşı inkâr edip da‘vâsına mutâbık beyyine taleb olundukda udûl-i müslimînden Bestan b. Yusuf ve Mahmud b. Emîri nâm kimesneler mezbûr Mehmed’in da‘vâsına lafzen ve ma‘nen mutâbık edâ-i şehâdet edip mezbûrânın şehâdetleri gıbbe’t-tezkiye hayyiz-i kabûlde vâkı‘ olup zikr olunan esbâblar mezbûr Mehmed’e teslîm olunup mâ hüve’l-vâkı‘ gıbbe’t-taleb kayd-ı sicil olundu. Tahrîren fî selh-i Saferi’l-hayr sene 971.


Şuhûdü’l-hâl: Alaaddin Efendi b. İbrahim ve Sinan Halîfe b. Udul ve Seyyid Sefer b. Seyyid Yunus ve Sinan Bey b. Abdullah ve gayruhum