.:: İstanbul Kadı Sicilleri ::.


Üsküdar Mahkemesi 26 Numaralı Sicil (H. 970-971 / M. 1562-1563)
cilt: 7, sayfa: 187
Hüküm no: 312
Orijinal metin no: [23b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ali Çelebi b. Lütfi’nin, Emir b. Hızır’ı arazi şikâyetinden vazgeçtiği

Sebeb-i tahrîr-i kitâb ve mûcib-i tastîr-i hitâb budur ki Kasaba-i Gekvize’ye tâbi‘ Denizli nâm karyeden Ali Çelebi b. Lütfi nâm kimesne meclis-i şer‘de Emir b. Hızır nâm kimesne mahzarında bi-tav‘ihî ikrâr-ı sahîh-i şer‘î ve i‘tirâf-ı sarîh-i mer‘î kılıp dedi ki, karye-i Bozöyük toprağına dâhil Güneşyeri demekle ma‘rûf otuz iki akçe resimli bir çiftlik yer ki hudûdu inde’l-ahâlî ma‘lûme zikr olan yerde mezbûr Emir ile mâbeynimizde nizâ‘ımız var idi min ba‘d da‘vâdan ferâgat edip mezbûr yeri merkūm Emir’e teslîm ettim şimden geri keyfemâ yeşâ mutasarrıf ola deyip ve mezbûr Emir dahi müşârunileyh Ali Çelebi’de min ba‘d gayrı da‘vâm ve nizâ‘ım yokdur eğer edersem inde’l-hükkâm mesmû‘ ve makbûl olmaya deyip her biri âharının zimmetlerin ibrâ ve iskāt ettik deyu tesâdukları alâ mâ hüve’l-vâkı‘ ber sebîl-i temessük ketb olunup yed-i tâlibe vaz‘ ve def‘ olundu ki lede’l-hâce temessük edine. Tahrîren fî evâili şehri Rebî‘ilevvel sene ihdâ ve seb‘îne ve tis‘a-mi’e.


Şuhûdü’l-hâl: Alagöz Bey b. Abdullah ve Memi b. Yahya ve Solak Ali Bey b. Abdullah ve Nebi Halîfe b. Hasan ve Odabaşı b. Mustafa ve Mustafa b. Mehmed ve Veli Çelebi b. Alagöz Bey ve Kaya Veli b. Mehmed ve Ali b. Behram ve gayruhum