|
Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 189 Hüküm no: 317 Orijinal metin no: [24a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Abdi Çelebi b. Lütfi’nin, ölen Mehmed Efendi b. Koca Mustafa’daki alacağının vârisler tarafından ödenmesi
Vech-i tahrîr-i hurûf oldur ki Mahmiye-i Üsküdar’dan Abdi Çelebi b. Lütfi meclis-i şer‘de Yoros kazâsından karye-i Akviran’dan vefât eden Mehmed Efendi b. Koca Mustafa nâm kimesnenin eytâmına vâsi olan Memi b. İbrahim mahzarında da‘vâ edip dedi ki, mezbûr Mehmed Efendi’ye beş [yüz] altmış akçe karz-ı hasen vermiştim öldü zimmetinde kaldı taleb ederim dedikde, mezbûr Memi’ye suâl olundukda inkâr edip mezbûr Abdi Çelebi’den da‘vâsına mutâbık beyyine taleb olundukda udûl-i müslimînden Muslihiddin Halîfe b. Turahan ve Nuh Bâli b. Çalapverdi nâm kimesneler şöyle edâ-i şehâdet edip dediler ki mezbûr Mehmed Efendi hâl-i hayâtında bi-tav‘ihî ikrâr edip dedi ki, mezbûr Abdi Çelebi’ye beş yüz altmış akçe deynim vardır dedi öldü zimmetinde kaldı biz şâhidiz şehâdet ederiz dedikleri gıbbe’t-tezkiye hayyiz-i kabûlde vâkı‘ olup mûcibine hükm olunup mezbûr Abdi Çelebi’ye mezbûr Mehmed Efendi’den meblag-ı mezbûru almadığına yemîn billâh verilip mâ hüve’l-vâkı‘ gıbbe’t-taleb kayd-ı sicil olundu. Tahrîren fi’t-târîhi’l-mezbûr. İnde’ş-şuhûdi’l-mezkûrîn
Şuhûdü’l-hâl: Ali Çelebi b. Emir ve Bâli b. Süleyman ve Mustafa b. Mehmed ve Süleyman b. Abdullah ve gayruhum mine’l-hâzırîn Derkenar: Meblag-ı merkūm mezkûr Abdi Çelebi’ye karz mezbûr yedinden bi’t-tamâm teslîm olundu Vaka‘a’t-tahrîr fî evâhiri Rebî‘ilâhir sene 971.
Şuhûdü’l-hâl: Abdi b. Abdullah, Mustafa b. Mehmed ve Ali b. Hacıdır
|