.:: İstanbul Kadı Sicilleri ::.


Üsküdar Mahkemesi 26 Numaralı Sicil (H. 970-971 / M. 1562-1563)
cilt: 7, sayfa: 192
Hüküm no: 328
Orijinal metin no: [25a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Şirin bt. Abdullah’ın evini vakfettiği

Vech-i tahrîr-i hurûf oldur ki Mahmiye-i Üsküdar’da Davudpaşa mahallesinden Şahkulu b. Mustafa meclis-i şer‘de Şîrmerd Hoca b. Abdullah nâm kimesnenin mu‘tekası olan Şirin bt. Abdullah nâm hâtun mahzarında da‘vâ edip dedi ki, sen mahalle-i mezbûrede vâkı‘ olan mülk evi ki mahdûddur bir tarafı tarîk-ı âm ve bir tarafı tarîk-ı hâs ve bir tarafı Şeyh Muhyiddin b. Nefes mülkü ve bir tarafı Turan Paşa b. Hacı Mustafa mülkü ile işbu hudûd ile olan evi ki cemî‘-i tevâbi‘i ve levâhıkıyla Gerede Mescidi’ne vakf edip beni mütevellî ve ehl-i mahalleyi nâzır nasb edip mâdem ki kendin kayd-ı hayâtdasın kendin sâkine olup sen vefât ettikden sonra bey‘ olunup akçesinden mescid-i mezbûrda imâm olan kimesneye vermek için yüz bir cüz’ tilâvet edip bâki ne kalırsa mütevellî re’yi ile mühimmât-ı mescide sarf oluna deyip zikr olan evi bana teslîm-i şer‘iyle teslîm eylediğin rücû‘ edersin bi-tarîki’t-tevliye taleb ederim dedikde, mezbûre Şirin’e suâl olundukda inkâr edip mezbûr Şahkulu’dan da‘vâsına mutâbık beyyine taleb olundukda udûl-i müslimînden Mahmud b. Davud ve Mehmed b. Resul edâ-i şehâdet edip dediler ki mezbûre Şirin zikr olan evini Gerede Mescidi’ne vakf edip kendi vefât edince içinde sâkine ola ba‘de vefâtihâ zikr olunan ev bey‘ olunup akçesinden mescid-i mezbûrda imâm olan kimesne yevmî bir cüz’ kırâ’at edip bâki ne kalırsa içinden mescid-i mezbûrun mühimmâtına sarf oluna mütevellî re’yi ile deyip ve mezbûr Şahkulu’yu mütevellî nasb edip zikr olan evi mezbûra teslîm-i şer‘iyle teslîm edip ve ehl-i mahalleyi nâzır nasb etmiştir biz şâhidiz şehâdet ederiz dediklerinde mezbûrânın şehâdetleri gıbbe’t-tezkiye hayyiz-i kabûlde vâkı‘ olup mûcebine hükm olunup mâ hüve’l-vâkı‘ gıbbe’t-taleb kayd-ı sicil olundu. Tahrîren fî evâili Rebî‘ilevvel min şuhûri sene ihdâ ve seb‘îne ve tis‘a-mi’e.


Şuhûdü’l-hâl: Devlethan b. Halil, İsmail b. Yakup, Hasan b. Elhâc Hüseyin, Ali b. Mustafa, Mahmud b. Yusuf, Hasan b. Mürüvvet, Veys b. Yusuf, Mahmud b. Kemal, Hacı Hamza b. Mustafa ve Mustafa b. Mehmed ve Ali b. Behram ve Nasuh b. Hamza ve gayruhum