|
Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 198 Hüküm no: 341 Orijinal metin no: [26a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Alagöz Bey b. Abdullah’ın, Arab köleyi Mevlana Muslihiddin Halife b. Mehmed’e satması
Sebeb-i tahrîr-i kitâb ve bâ‘is-i tastîr-i hitâb budur ki Mahmiye-i Üsküdar’da havâss-ı hümâyûn emîni olan Alagöz Bey b. Abdullah’ın sene seb‘îne ve tis‘a-mi’e Zilhiccesi’nin beşinci günü tutulup meclis-i şer‘de rıkkıyyetin ve ibâkatin i‘tirâf edip sâhibi nâ-ma‘lûm olduğu ecilden hıfz için habsinde olan işbu orta boylu elâ gözlü galîzü’l-müsennâ sol yanağı benli Remûdiyyü’l-asl Arab oğlanının kānûn-ı pâdişâhî üzerine müddet-i örfiyyesi tamâm olup emîn-i mezbûra bey‘ edip akçesin hazîne-i âmireye teslîm etmek için kıbel-i şer‘den icâzet taleb ettikde icâzet verilip üç gün sûk-ı sultânîde beyne’t-tâlibîn ve’r-ragibîn bey‘-i men yezîd olup bi’l-âhare işbu hâfızü’l-kitâb Mevlânâ Muslihiddin Halîfe b. Mehmed’in üzerinde bin akçeye karâr edip merkūm kulu emîn-i mezbûr müşârunileyh Muslihiddin Halîfe’ye bin akçeye bey‘ edip kabz-ı semen edip kıbel-i şer‘den temessük taleb eyledikleri ecilden bu vesîka ketb olunup hâfız yedine vaz‘ olundu ki lede’l-hâce temessük edine. Tahrîren fî 9 şehri Rebî‘ilevvel min şuhûr sene 971.
Şuhûdü’l-hâl: Mevlânâ Sinan Halîfe b. Hacı Fakih ve Mevlânâ Tâceddin Halîfe ve Ahmed Çelebi b. Hasan ve Nebi Halîfe b. Hasan ve Hasan Halîfe b. Süleyman ve Mustafa b. Mehmed ve Ali b. Behram ve ehûhu Hüseyin el-muhzır ve Nasuh b. Hamza el-muhzır ve Kasım Halîfe b. Ahmed ve gayruhum
|