.:: İstanbul Kadı Sicilleri ::.


Üsküdar Mahkemesi 26 Numaralı Sicil (H. 970-971 / M. 1562-1563)
cilt: 7, sayfa: 208
Hüküm no: 367
Orijinal metin no: [29a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ölen Seyyid Ahmed’in eşyalarının babası Şehsuvar b. Hüseyin’e verilmesi

Vech-i tahrîr-i hurûf oldur ki Kürd tâifesinden Şehsuvar b. Hüseyin meclis-i şer‘a zaîmü’l-vakt olan Alagöz Bey b. Abdullah’ı meclis-i şer‘a ihzâr edip merhûm Sultan Mehmed hanında vefât eden Seyyid Ahmed nâm oğlum hâl-i hayâtında Boyacı Hacı Ali’de bir bulkarî sâde sofra ve bir sürmâyî çuka yağmurluk ve bir mavi ferâce ve bir mavi şalvar ve bir mavi zıbın ve bir yeşil zıbın ve bir alaca gömlek ve köhne tülbent börkü bu cümle esbâbı mesfûr oğlum mezbûr Hacı Ali’de emânet koyup vefât ettikden sonra zikr olan esbâbı mezbûr Boyacı’dan almışsın şer‘le bi-tarîki’l-irs hakkımdır taleb ederim dedikde, mezbûr Alagöz’e suâl olundukda gıbbe’l-inkâr mesfûr Şehsuvar’ın sıdk-ı da‘vâsına beyyine taleb olundukda udûl-i müslimînden Hamza b. Hayreddin ve Ahmed b. Yusuf edâ-i şehâdet edip dediler ki, bu zikr olan esbâb mezbûr Seyyid Ahmed müşârunileyh Boyacı Elhâc Ali’de emânet konup ve mesfûr Şehsuvar’ın sulbî oğlu idiğine şâhidleriz şehâdet dahi ederiz dediklerinde şâhidânın şehâdetleri ba‘de’t-tezkiye ve’t-ta‘dîl hayyiz-i kabûlde vâkı‘ olup gıbbe’t-taleb kayd-ı sicil olundu. Tahrîren fî evâhiri Rebî‘ilevvel sene 971.


Şuhûdü’l-hâl: Abdi Çelebi b. Elhâc Lütfi, Elhâc Muslihiddin b. Hamza ve Müstecib b. Mustafa ve gayruhum