.:: İstanbul Kadı Sicilleri ::.


Üsküdar Mahkemesi 26 Numaralı Sicil (H. 970-971 / M. 1562-1563)
cilt: 7, sayfa: 240
Hüküm no: 456
Orijinal metin no: [38a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Sultan Selim Han Vakfı’nın Depecük ve Karaağaç Cuması divanı mültezimlerinden alacakların tahsil edilmesi

Vech-i tahrîr-i hurûf oldur ki Merhûm ve magfûrun leh Sultan Selim Hân -aleyhi rahmeti’r-Rahmân- evkāfından Üsküdar muzâfâtından Kadı ve gayrı karyelere berât-ı pâdişâhîyle kâtib olan Mehmed b. Ali meclis-i şer‘a nefs-i Gekvize’den Hüseyin ve Memi b. İsa’yı ihzâr edip sâbıkā Depecük ve Karaağaç Cuması divânını evvelden olageldiği üzere yirmi altı bin akçeye iltizâm edip meblag-ı merkūmdan iki bin beş yüz seksen akçe bâki kalmıştır vakf için taleb ederim dedikde, mezbûr Memi’ye suâl olundukda zikr olan mukāta‘ayı Musa nâm kimesne ile yirmi dört bine sâbıkā iltizâm edip meblag-ı mezbûrdan bin akçe deynim kalıp meblag-ı mezbûrdan dahi karındaşım Mustafa ile gönderdim dedikde, mezbûr Mehmed mezbûr Mustafa’dan altı altınını aldım dediği gıbbe’t-taleb kayd-ı sicil olundu. Tahrîren fî 19 Rebî‘ilâhir li-sene 971.


Şuhûdü’l-hâl: Mevlânâ Tâceddin Efendi b. Ömer ve Nasuh b. Hamza ve Hüseyin b. Hacı ve gayruhum mine’l-hâzırîn