|
Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 287 Hüküm no: 590 Orijinal metin no: [50b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mahmud Çavuş b. Mehmed ile Gazanfer Bey b. Abdülhay’ın alacak-verecek konusundan sulh olduğu
Vech-i tahrîr-i hurûf oldur ki Kazâ-i İnegöl’den Mahmud Çavuş b. Mehmed meclis-i şer‘a fahrü’l-emâsil ve’l-akrân Ali Bey Kethudâsı Gazanfer Bey b. Abdulhay ihzâr edip üzerine takrîr-i da‘vâ kılıp dedi ki, sana iki deve ve inek ve keçi ve at ve sâbet ve tülbent ve bıçak ve karz altın vermiş idim deyu da‘vâ etmiş idim ve bir deve ve bir at sâbit-i ikrâr edip bâki inkâr edicek Müslümanlar araya girip es-sulhu hayrun hadîsiyle amel olunup cümleten yüz otuz beş altına ibrâ ve iskāt ettik bu güne gelince mezbûr Gazanfer’de bir akçe ve bir habbe hakkım kalmadı aldım haklaştım ve illâ inde’l-hükkâm mesmû‘ olmasın deyu ikrâr edip ve mezbûr Gazanfer dahi bi’l-muvâcehe mezbûr Mahmud Çavuş vicâhen tasdîk edip benim dahi mezbûr Mahmud Çavuş bedel irürdüğüm akçeden ve gayrı min ba‘d da‘vâ ve nizâ‘ım yokdur ve illâ inde’l-hükkâm mesmû‘ ve makbûl olmasın deyu ikrâr ettikde, tarafeynden sâdır olan ikrârları bi-hasebi’ş-şer‘i’ş-şerîf şer‘an mu‘teber görülüp sıhhat-ı ibrâya hükm olundu hükmen sahîhan şer‘iyyen. Vaka‘a’t-tahrîr fî evâsıtı Cemâziyelevvel sene 971.
Şuhûdü’l-hâl: Şaban b. Ali, Şem‘ullah b. Deniz ve Deniz b. Şem‘ullah, Ali b. Bahâdır, Hamza b. Abdullah Râcil, Ahmed Bey b. Abdullah, Mehmed Bey b. Abdullah Râcil, Sefer b. Mahmud, Bâli b. Ahmed, Mahmud b. Ahmed, Alagöz Bey b. Abdullah Zaîm, Mustafa b. Mehmed, Nasuh b. Hamza ve gayruhum
|