|
Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 299 Hüküm no: 622 Orijinal metin no: [54a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Turabi b. Hamza ile oğlunun, damadı Ali b. Abdullah’la miras ve nafaka konusunda anlaştığı
Vech-i tahrîr-i sicil budur ki Mahalle-i Kebçe’den Turâbi b. Hamza ve oğlu Mustafa meclis-i şer‘a ikrâr ve i‘tirâf edip dedi ki, işbu güveyim Ali b. Abdullah nâm yeniçeri Hatice nâm kızının nafaka taleb ettim anda ve dahi fevt olan kızı Ayşe intikāl eden hisse ki südüs hisse Mehmed b. Abdullah ve Ahmed b. Pîrdede şehâdetleriyle vekâlet sâbit oldukdan sonra anası Cennet bt. Hüseyin tarafından bi’l-vekâle dedi ki, mezkûr olan Ayşe’den intikāl hisseden ve Hatice’nin nafakasından ferâgat ettik yedi yıla değin eğer nafakam taleb edersek inde’l-hükkâm mesmû‘ olmasın dedikde, mezbûr Ali dahi bu mezkûrdan bedel bir çatma ev verdim yerinden kaldırıp almak üzere verdim aramızda kat‘-ı nizâ‘ ve fasl-ı husûmet etmez ve illâ inde’l-hükkâm mesmû‘ olmaya dedikde, tarafeynden sâdır olan ikrârları inde’ş-şer‘ mu‘teber görülüp sıhhat-ı ikrâra hükm olundu ki bi’t-taleb kayd-ı sicil olundu. Vaka‘a’t-tahrîr fî evâhiri Cemâziyelevvel sene 971.
Şuhûdü’l-hâl: Ali b. Hacı Behram, Hüseyin b. Ali Râcil, Nebi Fakih b. Hasan el-Mü’ezzin, Sinan Yeniçeri b. Abdullah, Mehmed b. Abdullah, Ahmed b. Pîrdede ve gayruhum
|